آزاد جموں و کشمیر اسمبلی کی 8 مخصوص نشستوں پر انتخابات 24 اگست کو ہوں گے۔ الیکشن کمیشن نے مخصوص نشستوں کے لیے انتخابی شیڈول جاری کر دیا ہے، جبکہ امیدواروں کے نام بھی سامنے آگئے ہیں۔
الیکشن کمیشن کے نوٹیفکیشن کے مطابق مخصوص نشستوں میں خواتین کے لیے 5 نشستیں شامل ہیں، جبکہ علما و مشائخ، بیرون ملک مقیم کشمیریوں اور ٹیکنوکریٹس و دیگر پروفیشنلز کے لیے ایک، ایک نشست مختص ہے۔
انتخابی شیڈول کے مطابق امیدوار 20 اگست کو صبح 9 بجے سے دوپہر 2 بجے تک کاغذات نامزدگی جمع کرا سکیں گے۔ اسی روز کاغذات نامزدگی کی جانچ پڑتال مکمل کرکے درست امیدواروں کی فہرست جاری کی جائے گی۔
کاغذات نامزدگی منظور یا مسترد کیے جانے کے خلاف اپیلیں 21 اگست کو صبح 9 بجے سے دوپہر 12 بجے تک دائر کی جا سکیں گی۔ الیکشن کمیشن ان اپیلوں پر 22 اگست کو سماعت کرکے فیصلے سنائے گا۔
امیدوار 23 اگست کو دوپہر 2 بجے تک اپنے کاغذات نامزدگی واپس لے سکیں گے، جس کے بعد مخصوص نشستوں کے لیے امیدواروں کی حتمی فہرست جاری کی جائے گی۔
الیکشن کمیشن کے مطابق مخصوص نشستوں پر پولنگ 24 اگست کو صبح 10 بجے سے دوپہر ایک بجے تک ہوگی۔ پولنگ آزاد جموں و کشمیر قانون ساز اسمبلی ہال، بلاک نمبر 12، سول سیکریٹریٹ چتر کلاس، مظفرآباد میں کرائی جائے گی۔
