دبئی میں جاری انڈر 19 ایشیا کپ کے ساتویں میچ میں پاکستان نے متحدہ عرب امارات کو 69 رنز سے شکست دے کر مسلسل دوسری کامیابی حاصل کرلی ۔
یو اے ای نے ٹاس جیت کر پاکستان کو بیٹنگ کی دعوت دی، پاکستانی ٹیم نے مقررہ اوورز میں 3 وکٹوں کے نقصان پر 314 رنز بنائے ۔
شاہ زیب خان نے مسلسل دوسرے میچ میں بھی شاندار بیٹنگ کی اور 132 رنز بناکر آوٹ ہوئے ،محمد ریاض اللہ نے 106رنز کی اننگز کھیلی ۔
پاکستان کے 315 رنز ہدف کے تعاقب میں یو اے ای نے مقررہ اوورز میں 8 وکٹوں کے نقصان پر 245 رنز بنائے، ایتھن ڈی سوزا 84 جبکہ محمد ریان 50 رنز بناکر نمایاں رہے ۔
پاکستان کی جانب سے عبدالسبحان نے شاندار باولنگ کرتے ہوئے 6 کھلاڑیوں کو آوٹ کیا ، محمد احمد نے 2 وکٹیں اپنے نام کیں ۔
رواں ٹورنامنٹ میں قومی انڈر 19 ٹیم کی یہ مسلسل دوسری کامیابی ہے، اس سے قبل اپنے پہلے میچ میں پاکستان نے روایتی حریف بھارت کو 43 رنز سے شکست دی تھی ۔
