ملک کے مختلف علاقوں میں آئندہ دنوں کے دوران تیز ہواؤں، طوفان، آندھی اور گرج چمک کے ساتھ بارشوں کا امکان ظاہر کیا گیا ہے۔ محکمہ موسمیات کے مطابق خیبر پختونخوا اور بلوچستان کے مختلف اضلاع میں شام کے اوقات میں طوفانی بارشوں اور ژالہ باری کا امکان ہے۔
پشاور، مردان، صوابی، کوہاٹ، کرک اور بنوں میں تیز بارشوں کی پیش گوئی کی گئی ہے جبکہ ڈیرہ اسماعیل خان، سوات، دیر اور شمالی وزیرستان میں بھی تیز ہواؤں کے ساتھ بارش کا امکان ظاہر کیا گیا ہے۔ اسی طرح کوہستان، شانگلہ اور بونیر میں بھی موسمی صورتحال خراب رہنے کی پیش گوئی کی گئی ہے۔
بلوچستان کے اضلاع قلعہ عبداللہ، ہرنائی، سبی، بارکھان، خضدار اور ڈیرہ بگٹی میں بھی بعض مقامات پر بارش کا امکان ظاہر کیا گیا ہے۔ تاہم ملک کے دیگر حصوں میں موسم گرم اور خشک رہنے کی توقع ہے۔
دوسری جانب نیشنل ڈیزاسٹر مینجمنٹ اتھارٹی (این ڈی ایم اے) کے ترجمان کے مطابق 22 جون تک خیبر پختونخوا، گلگت بلتستان اور آزاد کشمیر میں لینڈ سلائیڈنگ اور سیلابی صورتحال کا خدشہ موجود ہے۔ ترجمان نے خبردار کیا ہے کہ پہاڑی علاقوں سے ملبہ اور پتھر نچلے علاقوں میں بہہ کر آنے سے نقصان ہو سکتا ہے۔
این ڈی ایم اے نے یہ بھی کہا ہے کہ قراقرم ہائی وے سمیت کئی اہم شاہراہیں لینڈ سلائیڈنگ کے باعث متاثر ہو سکتی ہیں، جس سے ٹریفک کی روانی میں مشکلات پیش آ سکتی ہیں۔
