گلگت بلتستان اور آزاد کشمیر میں مزید بارشوں اور سیلاب کا الرٹ جاری کر دیا گیا،این ڈی ایم اے کے مطابق گلگت، سکردو، ہنزہ اور شگر میں آج سے 31 جولائی کے دوران شدید بارش متوقع ہے، اس دوران کشمیر کے علاقوں مظفر آباد، وادی نیلم اور باغ میں بھی خوب بارشوں کا امکان ہے ۔
این ڈی ایم اے کے الرٹ میں کہا گیا ہے کہ بارشوں کے باعث سیلابی صورت حال پید ا ہو نے کا خدشہ ہے، جب کہ پہاڑی علاقوں میں شدید بارشوں کے پیش نظر لینڈ سلائیڈنگ کی بھی توقع ہے ۔
وادی چترال، بونی اور ریشن کے علاقوں میں ممکنہ بارش اور گلیشرز کے پگھلنے کے باعث دریائے چترال کے بہاؤ میں اضافہ ہوسکتا ہے، بارشوں کے پیش نظر مظفرآباد اور باغ کے شہری علاقوں میں سیلابی صورتحال پیش آسکتی ہے ۔
این ڈی ایم اے نے تمام متعلقہ اداروں کوممکنہ صورتحال کے پیش نظر پیشگی اقداما ت کی ہدایت جاری کرتے ہوئے ہدایت کی ہے کہ تمام ادارے ہنگامی حالات سے نمٹنے کے لیے اہلکار، مشینری اور ریسکیو ٹیمیں تیار رکھیں ۔
مقامی انتظامیہ اور صوبائی ڈیزاسٹر مینجمنٹ اتھارٹیز (پی ڈی ایم ایز) کو ہنگامی صورتحال سے نمٹنے اور بروقت اقدامات کی ہدایت جاری کی گئی ہے ۔
