وفاقی وزیر داخلہ و انسداد منشیات محسن نقوی نے اینٹی نارکوٹکس فورس (اے این ایف) ہیڈکوارٹر کا دورہ کیا جہاں ڈی جی اے این ایف میجر جنرل عبدالمعید نے ان کا استقبال کیا۔ اس موقع پر وفاقی وزیر نے زیر تعمیر نیشنل کاؤنٹر نارکوٹکس کوآرڈینیشن سینٹر کا بھی معائنہ کیا۔
وفاقی وزیر داخلہ و انسداد منشیات محسن نقوی کی زیر صدارت اے این ایف ہیڈکوارٹر میں ایک اہم اجلاس بھی منعقد ہوا۔ اجلاس سے خطاب کرتے ہوئے محسن نقوی نے کہا کہ نئی نسل کو منشیات کی لعنت سے بچانے کے لیے ہر سطح پر بھرپور کریک ڈاؤن جاری رکھا جائے گا۔ انہوں نے ہدایت کی کہ تعلیمی اداروں میں منشیات کے استعمال کے خلاف آگاہی مہم کو مزید مؤثر بنایا جائے۔
محسن نقوی نے کم وسائل اور محدود افرادی قوت کے باوجود انسداد منشیات کے سلسلے میں مؤثر کارروائیوں پر اے این ایف کی کارکردگی کو سراہا۔ اجلاس کے دوران اے این ایف کے حال ہی میں شہید ہونے والے 6 اہلکاروں کے درجات کی بلندی کے لیے دعا بھی کی گئی۔
اجلاس میں وفاقی وزیر داخلہ و انسداد منشیات کو اے این ایف کی کارکردگی، افعال کار اور جاری آپریشنز کے بارے میں تفصیلی بریفنگ دی گئی۔ بریفنگ میں بتایا گیا کہ منشیات کے جرائم میں سزا کی شرح 82 فیصد تک پہنچ چکی ہے جب کہ منشیات کے مکروہ دھندے میں ملوث 22 ملکی اور 9 غیر ملکی ڈرگ ٹریفکنگ تنظیموں کو توڑا جا چکا ہے۔
اس موقع پر پوپی کی فصل کی کاشت کو تلف کرنے سے متعلق اقدامات پر بھی بریفنگ دی گئی۔ مزید برآں ملازمین کی فلاح و بہبود کے لیے اے این ایف فاؤنڈیشن کے قیام کی اصولی منظوری بھی دی گئی۔ تعلیمی اداروں میں منشیات کے استعمال کے خلاف آگاہی مہم کو مزید مؤثر بنایا جائے۔
