وزیراعظم کے معاونِ خصوصی ہارون اختر خان سے پاکستان میں کویت کے سفیر ناصر عبدالرحمن جاسم المطیری نے ملاقات کی جس میں دوطرفہ تعلقات، سرمایہ کاری اور تجارتی تعاون کے فروغ پر تبادلہ خیال کیا گیا۔
ملاقات میں سیکرٹری صنعت سیف انجم، سیکرٹری تجارت جواد پال اور ڈی جی نیشنل لاجسٹکس کمپنی میجر جنرل فرخ شہزاد راؤ بھی شریک تھے۔ اس موقع پر ہارون اختر خان نے کہا کہ کویت پاکستان کا برادر ملک ہے اور دونوں ممالک کے درمیان دیرینہ اور مضبوط تعلقات قائم ہیں۔ انہوں نے کہا کہ وزیراعظم میاں محمد شہباز شریف کی قیادت میں پاکستان خطے میں امن کے قیام کے لیے متحرک کردار ادا کر رہا ہے۔
انہوں نے بتایا کہ وزیراعظم کی ہدایت پر خلیجی ممالک کو اضافی خوراک کی برآمد کے لیے خصوصی کمیٹیاں تشکیل دی جا چکی ہیں، جبکہ پاکستان اور کویت کے درمیان بزنس ٹو بزنس روابط اور سرمایہ کاری کے مواقع بڑھانے پر بھی توجہ دی جا رہی ہے۔ہارون اختر خان کا کہنا تھا کہ پاکستان کویت کے لیے ایک بڑی منڈی ہے اور قدرتی وسائل سے مالا مال ہے، اسی لیے دونوں ممالک کے درمیان سرمایہ کاری اور برآمدات میں مزید وسعت کی گنجائش موجود ہے۔ انہوں نے کہا کہ حکومت کا وژن خلیجی ممالک کے ساتھ روابط کو مضبوط بنا کر باہمی خوشحالی کو فروغ دینا ہے۔
کویتی سفیر ناصر عبدالرحمن جاسم المطیری نے مشکل حالات میں پاکستانی عوام کے تعاون کو سراہتے ہوئے کہا کہ کویت خوراک، انفارمیشن ٹیکنالوجی اور تجارت کے شعبوں میں پاکستان کے ساتھ تعاون کو مزید فروغ دے گا۔
