ایبٹ آباد (خصوصی رپورٹر) ڈی آئی جی ہزارہ ناصر محمود ستی نے حال ہی میں ہائیڈرو پاور پراجیکٹ بالاکوٹ کا دورہ کیا اور پراجیکٹ سائیٹ اور چائنیز کیمپ کے سیکیورٹی انتظامات کا تفصیلی جائزہ لیا۔ دورے کے دوران انہوں نے ڈرون کیمرے کے ذریعے سائیٹ کے داخلی و خارجی راستوں، حساس مقامات، واچ ٹاورز، سیکیورٹی بنکر روم اور سی سی ٹی وی روم کا معائنہ کیا۔
ڈی آئی جی ہزارہ نے منعقدہ موک ایکسرسائز کی بھی مانیٹرنگ کی اور اسے مزید بہتر بنانے کے لیے ہدایات جاری کیں۔ اس موقع پر ایس پی ایس ایس یو محمد عباس نے ڈی آئی جی ہزارہ کو سیکیورٹی انتظامات کے بارے میں تفصیلی بریفنگ دی۔
ناصر محمود ستی نے پولیس افسران اور سیکیورٹی اہلکاروں کو ہدایت کی کہ سیکیورٹی انتظامات میں کسی بھی قسم کی کمی یا کوتاہی برداشت نہیں کی جائے گی۔ اعلیٰ افسران کو ہدایت کی گئی کہ وہ وقتاً فوقتاً سائیٹ کا دورہ کریں اور چائنیز عہدیداران سے ملاقات کر کے سیکیورٹی صورتحال کی رپورٹ اپنے دفتر میں ارسال کریں۔
مزید برآں، متعلقہ اداروں کے ساتھ انفارمیشن شیئرنگ کے نظام کو مضبوط بنانے، سرچ اینڈ سٹرائیک آپریشنز کی نگرانی، وزیٹر ڈیٹا بیس کی تکمیل اور ایمرجنسی رسپانس پلان مرتب کرنے پر زور دیا گیا۔
بعد ازاں ڈی آئی جی ہزارہ نے چائنیز عہدیداران سے میٹنگ کی، جس میں جاری ترقیاتی پراجیکٹ کی پیش رفت اور سیکیورٹی انتظامات پر تفصیلی تبادلہ خیال کیا گیا۔ ڈی آئی جی نے کہا کہ چائنیز ماہرین اور عملے کی حفاظت خیبرپختونخواہ کی اولین ترجیحات میں شامل ہے اور تمام ممکنہ وسائل بروئے کار لا کر سیکیورٹی اقدامات کو مزید بہتر بنایا جا رہا ہے۔
چائنیز عہدیداران نے خیبرپختونخوا پولیس کی جانب سے فراہم کردہ سیکیورٹی انتظامات پر اطمینان کا اظہار کیا اور تعاون کو سراہا۔
