اسلام آباد: وزیراعظم محمد شہباز شریف سے وزیر پٹرولیم علی پرویز ملک کی ملاقات ہوئی۔
ملاقات میں وزیر اطلاعات و نشریات عطاءاللہ تارڑ، وزیر اقتصادی امور احد خان چیمہ، وزیر موسمیاتی تبدیلی ڈاکٹر مصدق ملک اور رکن قومی اسمبلی حمزہ شہباز بھی شریک تھے۔
وزیراعظم محمد شہباز شریف نے وزیر پٹرولیم علی پرویز ملک کو فی الفور کراچی پہنچنے اور آئل ریفائنریز سے مذاکرات کرنے کی ہدایت کی۔
انہوں نے کہا کہ وزیر پٹرولیم کراچی جا کر مقامی طور پر تیار کردہ ڈیزل کی قیمتوں میں کمی کے حوالے سے اقدامات یقینی بنائیں۔
وزیراعظم محمد شہباز شریف نے کہا کہ ڈیزل کی مقدار کا زیادہ تر حصہ مقامی ریفائنریز میں تیار ہوتا ہے اس کی قیمتوں میں کمی کیلئے وزیر پٹرولیم بذات خود ریفائنریز سے مذاکرات کو جلد از جلد مکمل کریں۔
انہوں نے ہدایت کی کہ جس قدر ممکن ہو عوام تک فوری ریلیف پہنچایا جائے۔
