پشاور (خصوصی رپورٹر) — کے ٹو اسلام آباد سے ہندکو زبان میں نشر ہونے والا معلوماتی اور ثقافتی پروگرام “ڈھیڈی” وادی ہزارہ سمیت ملک کے دیگر شہروں میں ناظرین کی پہلی پسند بنتا جا رہا ہے۔
یہ پروگرام طویل عرصے سے کامیابی کے ساتھ نشر کیا جا رہا ہے، جس کے میزبان کاشف ملک اپنے منفرد اندازِ گفتگو اور معلوماتی انداز کے باعث ناظرین میں خاصے مقبول ہیں۔ پروگرام کی کامیابی میں ان کی پیشکش کا نمایاں کردار ہے۔
پروگرام میں سواتی ماما کی انقلابی اور عوامی مزاحیہ شاعری جبکہ “بھولا” کی حاضر جوابی بھی ناظرین کو خوب محظوظ کرتی ہے۔ “ڈھیڈی” کی ایک خاص بات یہ بھی ہے کہ دنیا بھر میں مقیم وادی ہزارہ سے تعلق رکھنے والے ناظرین اسے نہایت دلچسپی سے دیکھتے ہیں، حتیٰ کہ دور دراز اور دشوار گزار علاقوں تک بھی اس کی رسائی ہو چکی ہے۔
اس شو کے ذریعے وادی ہزارہ کی قدرتی خوبصورتی کو اجاگر کیا جاتا ہے، جبکہ باصلاحیت نوجوان شعراء، لکھاریوں، سوشل ایکٹوسٹس اور لوک فنکاروں کو بھی اپنی صلاحیتیں دکھانے کا موقع فراہم کیا جاتا ہے۔ ناظرین نہ صرف ان کی پرفارمنس سے لطف اندوز ہوتے ہیں بلکہ مقامی ثقافت سے بھی روشناس ہوتے ہیں۔
تجزیہ کاروں کے مطابق “ڈھیڈی” اب محض ایک تفریحی پروگرام نہیں رہا بلکہ ایک مکمل ٹورسٹ گائیڈ کی حیثیت اختیار کر چکا ہے، جو وادی ہزارہ کی ثقافت، خوبصورتی اور صلاحیتوں کو دنیا کے سامنے پیش کر رہا ہے۔
