پاکستان اور بنگلا دیش کے مابین پہلے ٹیسٹ میچ کے دوسرے دن کا کھیل جاری ہے ، محمد رضوان اور سعود شکیل شاندار کھیل کا مظاہرہ کر رہے ہیں۔
دونوں کھلاڑیوں نے اپنے اپنے ٹیسٹ کیرئیر کی یہ تیسری سنچری اسکور کی ہے۔
پاکستان نے ٹیسٹ میچ کے دوسرے دن 4وکٹوں کے نقصان پر 158 رنز سے اننگز آگے بڑھائی، اس وقت سعود شکیل اور محمد رضوان کریز پر موجود ہیں ۔
کھیل کے پہلے روز بنگلادیش نے ٹاس جیت کر بولنگ کا فیصلہ کیا اور نئی گیند کا فائدہ اٹھاتے ہوئے پاکستان کے ابتدائی 3 کھلاڑیوں کو جلد ی آؤٹ کرنے میں کامیاب ہوئے۔
قومی ٹیم کی جانب سے کھیل کے پہلے دن 4 کھلاڑی آؤٹ ہوئے، قومی ٹیم کی پہلی وکٹ 3 کے مجموعی اسکور پر گری ، دوسری وکٹ 14 کے مجموعی اسکور پر کپتان شان مسعود کی گری جو 6 رنز بنا کر آؤٹ ہوئے۔
قومی ٹیم کو تیسرا نقصان بابراعظم کی صورت میں اٹھانا پڑا جو 2 گیندوں کا سامنا کرتے ہوئے صفر پر آؤٹ ہوئے، ان کے بعد وکٹ پر جمے ہوئے نوجوان بیٹر صائم ایوب 56 رنز پر آؤٹ ہوئے۔ بنگلادیش کی جانب سے اب تک شریف الاسلام اور حسن محمود نے 2،2 وکٹیں حاصل کیں۔
