اسلام آباد:چیئرمین سینیٹ سید یوسف رضا گیلانی سے زرعی ترقیاتی بینک لمیٹڈ کے صدر طاہر یعقوب بھٹی نے پارلیمنٹ ہاؤس اسلام آباد میں ملاقات کی۔ ملاقات کے دوران ملک کے زرعی شعبے کی مجموعی صورتحال، کسانوں کو درپیش چیلنجز اور زرعی ترقی کے فروغ کے لیے جاری اقدامات پر تفصیلی تبادلہ خیال کیا گیا۔
صدر زرعی ترقیاتی بینک لمیٹڈ نے چیئرمین سینیٹ کو بینک کی جانب سے کسانوں اور زمینداروں کے لیے متعارف کرائے گئے قرضہ جات پروگراموں پر بریفنگ دی۔ انہوں نے بتایا کہ بینک آسان شرائط پر مالی سہولیات اور مختلف ریلیف پیکجز فراہم کر رہا ہے تاکہ زرعی پیداوار میں اضافہ کیا جا سکے۔ انہوں نے آگاہ کیا کہ جدید تقاضوں کے مطابق بیج، کھاد، زرعی مشینری اور دیگر ضروری زرعی اخراجات کے لیے کسانوں کو بروقت مالی معاونت فراہم کی جا رہی ہے، جس کا مقصد زرعی شعبے کو مستحکم بنانا ہے۔
انہوں نے چھوٹے کاشتکاروں اور درمیانے درجے کے زمینداروں کے لیے متعارف کرائی گئی خصوصی اسکیموں سے بھی آگاہ کیا۔ ان اسکیموں کے تحت آسان اقساط، کم شرح منافع اور شفاف طریقہ کار کے ذریعے قرضوں کی فراہمی یقینی بنائی جا رہی ہے تاکہ زیادہ سے زیادہ کسان مستفید ہو سکیں۔ ان اقدامات سے نہ صرف کسانوں کو براہِ راست فائدہ پہنچے گا بلکہ قومی معیشت میں زراعت کے کردار کو مزید تقویت ملے گی۔
چیئرمین سینیٹ سید یوسف رضا گیلانی نے زرعی ترقیاتی بینک لمیٹڈ کی کاوشوں کو سراہتے ہوئے کہا کہ زراعت پاکستان کی معیشت کی ریڑھ کی ہڈی ہے اور کسانوں کو ریلیف فراہم کرنا قومی ترجیح ہے۔ انہوں نے اس عزم کا اعادہ کیا کہ پارلیمنٹ کسان دوست پالیسیوں اور زرعی شعبے کی ترقی کے لیے ہر ممکن تعاون جاری رکھے گی۔
