صوبہ پنجاب کے شہر چکوال میں ایک مقامی عدالت نے فائرنگ کے نتیجے میں ہلاک ہونے والی 9 سالہ پاکستانی نژاد آسٹریلین لڑکی کے قتل کے مقدمے میں گرفتار سی سی ڈی کے اہلکار کو جوڈیشل ریمانڈ پر جیل بھیج دیا ہے ۔
چکوال پولیس کے مطابق ابتدائی تحقیقات کے مطابق سی سی ڈی کے ملزم کانسٹیبل نے 10 اور 11 جون کی درمیانی شب ایک مبینہ ڈکیتی کو ناکام بنانے کی کوشش کے دوران فائرنگ کی، تاہم ’شناخت کی غلطی‘ کے باعث پاکستانی نژاد آسٹریلوی خاندان، جنہیں ڈاکو لوٹ رہے تھے، اس فائرنگ کا نشانہ بن گیا ۔
فائرنگ میں ملوث ملزم اہلکار کو چکوال کی مقامی عدالت میں پیش کیا گیا ، تفتیشی افسر نے عدالت کوبتایا کہ ملزم سے سرکاری گن برآمد کر لی گئی ہے جب کہ اس کا بیان بھی قلمبند کر لیا گیا ہے ۔
انہوں نے کہا کہ جس روز فائرنگ کا واقعہ پیش آیا، اُس روز سی سی ڈی اہلکار کی تھانے میں حاضری کو بھی چیک کیا گیا ہے، وہ گاڑی جس پر سرکاری بندوق سے فائرنگ کی گئی اور جائے حادثہ سے ملنے والے گولیوں کے خول کو ٹیسٹ کے لیے فرانزک لیبارٹری بھجوا دیا گیا ہے ۔
تفتیشی افسر نے مزید بتایا کہ چونکہ ملزم کا بیان ہو چکا ہے اور اُن سے سرکاری گن بھی قبضے میں لے لی گئی ہے، اس لیے تفتیشی ٹیم کو ملزم کے جسمانی ریمانڈ کی ضرورت نہیں، جس پر عدالت نے ملزم کو جوڈیشل ریمانڈ پر جیل بھیجنے کے احکامات جاری کیے ۔
دوسری طرف چکوال پولیس کا دعویٰ ہے کہ پاکستانی نژاد آسٹریلوی خاندان سے ڈکیتی میں ملوث دونوں ڈاکو ایک مبینہ مقابلے میں ہلاک ہو گئے ہیں، واضح رہے کہ چکوال میں پیش آئے اس واقعے میں بچی کے والد اور بھائی بھی سی سی ڈی اہلکار کی جانب سے کی گئی مبینہ فائرنگ کی زد میں آ کر زخمی ہوئے تھے ۔
