اسلام آباد: خیبر اکیڈمی فار میڈیا ٹیکنالوجیز (کیمٹیک) نے اقراء یونیورسٹی اسلام آباد کے فیکلٹی ممبران کے لیے جامع فیکلٹی ٹریننگ ورکشاپ کا انعقاد کیا، جس کا مقصد اساتذہ کو پیشہ ورانہ براڈکاسٹ ماحول سے عملی طور پر روشناس کرانا اور تعلیمی اداروں و میڈیا انڈسٹری کے درمیان روابط کو مزید مضبوط بنانا تھا۔
ورکشاپ کے دوران اقراء یونیورسٹی کے فیکلٹی ممبران کو ٹیلی ویژن نیٹ ورک کے پیشہ ورانہ ماحول، نیوز روم کے طریقہ کار، پروڈکشن تکنیک، براڈکاسٹ ورک فلو اور مختلف شعبہ جات کے باہمی تعاون کا عملی مشاہدہ کرایا گیا۔
شرکاء نے خیبر نیٹ ورک کے مختلف شعبہ جات کا دورہ کیا اور ایک جدید براڈکاسٹ ادارے کے انتظامی و پیشہ ورانہ طریقہ کار کے بارے میں آگاہی حاصل کی۔ فیکلٹی ممبران نے سینٹرل نیوز روم کا بھی دورہ کیا، جہاں انہیں خبر کی تلاش، ایڈیٹوریل پلاننگ، نیوز کوآرڈی نیشن اور بلیٹن کی تیاری کے مختلف مراحل سے آگاہ کیا گیا۔
ورکشاپ کے دوران پروڈکشن کنٹرول روم (PCR) اور ماسٹر کنٹرول روم (MCR) کے کام اور ذمہ داریوں کے بارے میں بھی تفصیلی بریفنگ دی گئی۔ شرکاء نے عملی طور پر سمجھا کہ نیوز روم، پروڈکشن اور تکنیکی ٹیمیں کس طرح باہمی رابطے کے ذریعے ٹیلی ویژن مواد کو ناظرین تک پہنچاتی ہیں۔
ورکشاپ کا ایک اہم حصہ ٹیلی ویژن اینکر کے نقطۂ نظر سے براڈکاسٹ ماحول کا تجربہ بھی تھا۔ فیکلٹی ممبران نے فرضی لائیو نیوز بلیٹن میں حصہ لیا، جس کے ذریعے انہیں براہِ راست نشریات کے دوران پیش آنے والے دباؤ، ٹیم کوآرڈی نیشن اور پیشہ ورانہ تقاضوں کو عملی طور پر سمجھنے کا موقع ملا۔
اس موقع پر ایک جامع اور انٹرایکٹو سیشن بھی منعقد کیا گیا، جس میں فیکلٹی ممبران نے سوالات کیے، اپنے مشاہدات شیئر کیے اور میڈیا انڈسٹری کو درپیش موجودہ چیلنجز اور مستقبل کے مواقع پر تبادلہ خیال کیا۔
کیوان حامد راجہ کا خصوصی لیکچر
ورکشاپ کے اہم سیشن سے کیوان حامد راجہ، ایگزیکٹو ڈائریکٹر خیبر نیٹ ورک، چیف ایگزیکٹو آفیسر خیبر ڈیجیٹل اور بانی کیمٹیک نے خطاب کیا۔
انہوں نے اپنے پیشہ ورانہ تجربات کی روشنی میں میڈیا اور ڈیجیٹل انڈسٹری میں تیزی سے آنے والی تبدیلیوں اور بدلتی ہوئی پیشہ ورانہ ضروریات پر تفصیلی گفتگو کی۔ انہوں نے کہا کہ موجودہ میڈیا کے ماحول میں طلبہ کے لیے نظریاتی تعلیم کے ساتھ عملی مہارت، ٹیکنالوجی سے آگاہی، تخلیقی صلاحیت اور انڈسٹری ایکسپوژر بھی انتہائی اہم ہیں۔
کیوان حامد راجہ نے فیکلٹی ممبران کے سوالات کے جوابات بھی دیے اور براڈکاسٹ پروڈکشن، ڈیجیٹل میڈیا، نیوز روم پریکٹسز، جدید ٹیکنالوجی اور میڈیا انڈسٹری کی ضروریات سے متعلق مختلف امور پر تفصیلی تبادلہ خیال کیا۔
عملی تربیت پر خصوصی توجہ
ورکشاپ میں Learning by Doing یعنی عملی تجربے کے ذریعے سیکھنے کی اہمیت کو اجاگر کیا گیا۔ شرکاء کو بتایا گیا کہ میڈیا ایجوکیشن میں کتابی اور نظریاتی علم اس وقت زیادہ مؤثر ثابت ہوتا ہے جب طلبہ کو حقیقی پیشہ ورانہ ماحول میں کام کرنے اور عملی صورتحال کا سامنا کرنے کے مواقع بھی فراہم کیے جائیں۔
اقراء یونیورسٹی کے فیکلٹی ممبران نے کام ٹیک اور خیبر نیٹ ورک کے اس اقدام کو سراہتے ہوئے پیشہ ورانہ ماحول، ادارہ جاتی نظم و نسق اور براڈکاسٹ ورک فلو کی تعریف کی۔ انہوں نے کہا کہ اس طرح کے عملی تجربات اساتذہ کو کلاس روم میں طلبہ کو میڈیا انڈسٹری کے حقیقی تقاضوں سے بہتر انداز میں آگاہ کرنے میں مدد دیتے ہیں۔
کیمٹیک کی جانب سے منعقدہ یہ ورکشاپ اکیڈمیا اور میڈیا انڈسٹری کے درمیان روابط مضبوط بنانے کے عزم کا اظہار ہے۔ اس اقدام کا مقصد اساتذہ اور طلبہ کو پیشہ ورانہ میڈیا ماحول سے براہِ راست جوڑنا اور انہیں جدید براڈکاسٹنگ، نیوز پروڈکشن اور ڈیجیٹل میڈیا کی عملی ضروریات سے ہم آہنگ کرنا ہے۔
کام ٹیک کے مطابق تعلیمی اداروں اور میڈیا انڈسٹری کے درمیان ایسے روابط مستقبل کے میڈیا پروفیشنلز کی تیاری میں اہم کردار ادا کرسکتے ہیں، تاکہ نئی نسل کو صرف تعلیمی معلومات ہی نہیں بلکہ عملی مہارت، پیشہ ورانہ تجربہ اور صنعت کی بدلتی ہوئی ضروریات کی سمجھ بھی حاصل ہو۔
