وزیر اعظم شہباز شریف نے مکہ مکرمہ کے مقدس مقام پر حوثیوں کے ڈرون حملے کی بزدلانہ اور گھناؤنی کوشش کی شدید ترین الفاظ میں مذمت کی ہے اور واضح کیا ہے کہ یہ حملے ناقابل معافی ہیں، وزیراعظم نے واضح کیا کہ حرمین الشریفین کے تحفظ کیلئے پوری قوم سعودیہ کے شانہ بشانہ کھڑی ہے ۔
اسلام آباد: سماجی رابطے کی ویب سائٹ ایکس پر جاری اپنے ایک بیان میں وزیراعظم شہباز شریف کا کہنا تھا کہ پاکستان کے عوام اس اشتعال انگیز حرکت پر رنجیدہ اور فکرمند ہیں، اس قابلِ مذمت اور ناقابلِ معافی فعل پر ہمیں جس گہرے دکھ اور صدمے کا سامنا ہے، اسے بیان کرنے کیلئے الفاظ ناکافی ہیں ۔
انہوں نے کہا کہ ہم شاہی سعودی مسلح افواج کی غیر معمولی مستعدی، بہادری اور پیشہ ورانہ مہارت کو خراجِ تحسین پیش کرتے ہیں جنہوں نے بروقت اور بہادرانہ کارروائی کی ۔
وزیراعظم کا کہنا تھا کہ میں ایک بار پھر تمام فریقین سے اپیل کرتا ہوں کہ وہ انتہائی تحمل کا مظاہرہ کریں، بات چیت اور سفارت کاری ہی امن کے حصول کا واحد پائیدار راستہ ہے ۔
وزیرا عظم شہبازشریف نے کہا کہ پاکستان برادر ملک مملکتِ سعودی عرب کی خودمختاری اور علاقائی سالمیت کے دفاع کے ساتھ ساتھ حرمین شریفین کے تحفظ اور تقدس کے معاملے میں غیر متزلزل طور پر اور شانہ بشانہ کھڑا ہے، یہ ایک ایسا فرض ہے جسے ہر پاکستانی اپنے دل کے بہت قریب سمجھتا ہے ۔
