گلگت: الیکشن ٹربیونل نے عطاء اللہ کی جانب سے دائر انتخابی پٹیشن پر GBA-16 دیامر 2 سے امام مالک کی کامیابی اور رکنیت کا نوٹیفکیشن معطل کردیا۔
ٹربیونل نے ریٹرننگ افسر کو ہدایت کی ہے کہ پوسٹل بیلٹ پیپرز کی تصدیق اور گنتی 16 ستمبر تک مکمل کی جائے۔ پوسٹل بیلٹ کی گنتی مکمل ہونے کے بعد ریٹرننگ افسر نیا فارم 49 مرتب کرکے چیف الیکشن کمشنر کو ارسال کرے گا۔
الیکشن ٹربیونل نے پوسٹل بیلٹ کی تصدیق اور گنتی کا عمل شفاف انداز میں مکمل کرنے کی ہدایت کرتے ہوئے فریقین کے نمائندوں کی موجودگی یقینی بنانے کا بھی حکم دیا ہے۔
ٹربیونل کے مطابق پوسٹل بیلٹ کی گنتی کے دوران سینئر سول جج گلگت فہد بن نقیب اور اسسٹنٹ رجسٹرار چیف کورٹ راج میر کی موجودگی بھی یقینی بنائی جائے۔
دوسری جانب الیکشن ٹربیونل نے ایس ایس پی گلگت کو پوسٹل بیلٹ کی گنتی کے دوران سیکیورٹی کے سخت انتظامات یقینی بنانے کی ہدایت کی ہے۔
پوسٹل بیلٹ کی تصدیق اور گنتی کے بعد انتخابی نتائج کی صورتحال واضح ہوگی۔
