اسلام آباد: وزیراعظم محمد شہباز شریف کی زیرِ صدارت زرعی شعبے اور زرعی برآمدات کے فروغ کے حوالے سے اعلیٰ سطح اجلاس ہوا۔
وزیراعظم نے کہا کہ زرعی شعبہ پاکستان کی معیشت کی ترقی اور استحکام میں کلیدی کردار ادا کرتا ہے۔
فی ایکڑ زرعی پیداوار میں اضافے، زراعت میں جدت لانے، لائیو اسٹاک کے شعبے کی ترقی اور زرعی برآمدات کے فروغ کے لیے وفاق اور صوبوں کے درمیان مؤثر رابطہ اور شراکت داری ضروری ہے۔
وزیراعظم نے پاکستان کی زرعی مصنوعات کے لیے عالمی منڈیوں میں رسائی بڑھانے اور نئی منڈیاں تلاش کرنے کے لیے مربوط اقدامات کرنے کی ہدایت کی۔
انہوں نے زرعی برآمدات کے فروغ کے لیے پاکستان کے بیرونِ ملک مشنز میں تعینات کمرشل افسران کو مؤثر کردار ادا کرنے کی بھی ہدایت کی۔
وزیراعظم نے کسانوں کو فصلوں کی نگرانی کے لیے دستیاب موبائل ایپ کے حوالے سے آگاہی بڑھانے کے لیے مؤثر میڈیا مہم چلانے کی ہدایت کی۔
انہوں نے کہا کہ زرعی شعبے کی برآمدات بڑھانے کے لیے زرعی مصنوعات میں ویلیو ایڈیشن ناگزیر ہے۔
اجلاس میں زرعی شعبے کے فروغ اور زرعی برآمدات بڑھانے کے لیے مختلف تجاویز پیش کی گئیں۔
بریفنگ میں بتایا گیا کہ گزشتہ مالی سال میں پاکستان کے زرعی شعبے سے برآمدات 5.18 بلین امریکی ڈالر رہیں۔
بریفنگ کے مطابق چاول، فشریز، حلال گوشت، آلو، تل، تمباکو، آم اور مکئی پاکستان کی نمایاں زرعی برآمدات رہیں۔
زرعی برآمدات میں اضافے کے لیے ویلیو چینز تشکیل دینے کی تجویز بھی پیش کی گئی۔
اجلاس میں مختلف وفاقی وزرا سمیت متعلقہ اعلیٰ سرکاری افسران نے شرکت کی۔
