اسلام آباد: وفاقی وزیر داخلہ محسن نقوی نے بانیٔ پاکستان قائداعظم محمد علی جناحؒ کو ان کی عظیم جدوجہد اور بے مثال خدمات پر زبردست خراجِ عقیدت پیش کیا ہے۔
وفاقی وزیر نے کہا ہے کہ قائداعظمؒ نے ایک ملت کو نظریہ، شعور اور خودمختار ریاست دی۔
قائداعظمؒ کی جدوجہد آزادی پاکستان کی قومی تاریخ کا روشن اور ناقابلِ فراموش باب ہے۔
قائداعظم محمد علی جناحؒ کی 78ویں برسی کے موقع پر اپنے پیغام میں محسن نقوی نے کہا کہ قائداعظمؒ نے برصغیر کے مسلمانوں کو غلامی سے نکال کر ایک خودمختار وطن کی منزل تک پہنچایا۔
ان کی بے مثال قیادت اور سیاسی بصیرت کے نتیجے میں پاکستان دنیا کے نقشے پر ایک آزاد ریاست کے طور پر ابھرا۔
وفاقی وزیر داخلہ نے کہا کہ قائداعظمؒ کی شخصیت میں کردار کی بلندی، گفتار کی سچائی اور عمل کی یکسوئی کا امتزاج موجود تھا۔
انہوں نے کہا کہ بیماری اور کمزوری کے باوجود قائداعظمؒ کی ہمت، عزم اور استقلال متزلزل نہ ہوا اور انہوں نے اپنی قوم کو آزادی کی منزل سے ہمکنار کیا۔
محسن نقوی نے کہا کہ قائداعظم محمد علی جناحؒ اقلیتوں کے حقوق کے بڑے علمبردار تھے اور ریاست کو عوام کی امانت سمجھتے تھے۔
ان کا تصورِ ریاست شہریوں کے حقوق کے تحفظ، انصاف اور مساوات پر مبنی تھا۔
وفاقی وزیر داخلہ نے کہا کہ ایمان، اتحاد اور تنظیم قائداعظمؒ کی اصل امانت ہیں اور یہی پاکستان کی روح ہیں۔
قوم کو چاہیے کہ بانیٔ پاکستان کے ان اصولوں کو اپنی قومی زندگی کا حصہ بنائے اور ملک کی ترقی و استحکام کے لیے متحد ہوکر کردار ادا کرے۔
محسن نقوی نے کہا کہ پاکستان کی ترقی، خوشحالی اور استحکام قائداعظمؒ کے اصولوں پر عمل کرنے میں مضمر ہے۔
بانیٔ پاکستان کے وژن کو عملی شکل دینے اور ان کے خواب کی تعبیر کے لیے ہمیں دیانت، اتحاد، نظم و ضبط، قومی یکجہتی اور خدمتِ خلق کے جذبے کو فروغ دینا ہوگا۔
