لاہور: وزیراعلیٰ پنجاب مریم نواز شریف کی زیر صدارت محکمہ مواصلات کے ترقیاتی کاموں کے جائزہ اجلاس میں رنگ روڈ کی خوبصورتی اور ناردرن لوپ کی بحالی کے پلان کی منظوری دی گئی۔
وزیراعلیٰ پنجاب کو روڈ سیکٹر پورٹ فولیو اور فنڈز کے استعمال کی تفصیلات پیش کی گئیں۔
اجلا س سے خطاب کرتے ہوئے وزیراعلیٰ پنجاب مریم نواز شریف نے ہدایت کی کہ رنگ روڈ پر بین الاقوامی معیار کے سروس ایریاز بنائے جائیں اور پنجاب کی تمام شاہراہوں پر پراپر لین مارکنگ کو ہر صورت یقینی بنایا جائے۔
75 دنوں میں 1795 کلومیٹر طویل سڑکیں مکمل کرنے پر وزیراعلیٰ مریم نواز نے محکمہ تعمیرات کی کارکردگی کی تعریف کرتے ہوئے ہدایت کی کہ پنجاب بھر میں تمام زیر تعمیر سڑکوں کی تکمیل کی حتمی ٹائم لائن پیش کی جائے۔
انہوں نے پنجاب رنگ روڈ اتھارٹی کے تحت 6 نئے جدید سروس ایریاز قائم کرنے کی منظوری بھی دی۔
وزیر اعلیٰ مریم نواز کے ڈھائی سالہ دور حکومت میں مجموعی طور پر 32 ہزار سڑکیں مکمل کی گئیں۔
شفافیت اور رفتار کی نئی مثال قائم کرتے ہوئے 3 شفٹوں میں دن رات کام کیا گیا اور بحالی کے منصوبوں میں 11 ارب روپے کی تاریخی بچت ہوئی۔
وزیر اعلیٰ مریم نواز کے "سوہنے پنڈ سوہنیاں راہواں” پروگرام کے تحت دیہی روڈ انفراسٹرکچر میں بھی بڑی پیشرفت ہوئی اور صرف 75 دنوں میں 30 ارب روپے کی لاگت سے 1129 سڑکیں اور 1795 کلومیٹر طویل نیٹ ورک مکمل کیا گیا۔
وزیراعلیٰ انیشیٹو، لوکل روڈز اور تکمیل کے قریب منصوبوں کے لیے مجموعی طور پر 125 ارب روپے مختص کئے گئے۔
اجلاس میں پنجاب بھر میں انٹر ولیج سڑکیں نیٹ ورک سے منسلک کرنے کی ویڈیو پیش کی گئی۔
