لاہور: وزیراعلیٰ پنجاب مریم نواز شریف کی زیر صدارت سپیشلائزڈ ہیلتھ کیئر ڈیپارٹمنٹ کا اہم اجلاس ہوا، جس میں صوبے میں جاری بڑے طبی منصوبوں کی پیش رفت کا جائزہ لیا گیا۔ اجلاس میں نواز شریف انسٹی ٹیوٹ آف کارڈیالوجی سرگودھا، نواز شریف انسٹی ٹیوٹ آف کینسر ٹریٹمنٹ اینڈ ریسرچ اور جناح انسٹی ٹیوٹ آف کارڈیالوجی لاہور کے منصوبوں پر بریفنگ دی گئی۔
اجلاس میں نواز شریف انسٹی ٹیوٹ آف کارڈیالوجی سرگودھا کا افتتاح 15 جولائی کو کرنے کی منظوری دے دی گئی۔ وزیراعلیٰ مریم نواز شریف کو منصوبے کی ویڈیو بھی دکھائی گئی، جس پر انہوں نے سپیشلائزڈ ہیلتھ کیئر ٹیم اور آئی ڈی اے پی کی کارکردگی کو سراہا۔
مریم نواز شریف نے ہسپتال کے تعمیراتی معیار کی تعریف کرتے ہوئے کہا کہ نواز شریف انسٹی ٹیوٹ آف کارڈیالوجی سرگودھا کو دیکھ کر ایسا لگتا ہے جیسے سعودی عرب کا کوئی بڑا ہسپتال ہو۔
اجلاس کو بتایا گیا کہ نواز شریف انسٹی ٹیوٹ آف کینسر ٹریٹمنٹ اینڈ ریسرچ کے پیکیج اے اور بی 31 جولائی تک مکمل ہو جائیں گے۔ وزیراعلیٰ نے عندیہ دیا کہ کینسر ہسپتال کا افتتاح 31 جولائی 2026 کو کیا جائے گا۔
بریفنگ میں بتایا گیا کہ جناح انسٹی ٹیوٹ آف کارڈیالوجی لاہور کا افتتاح 15 اگست کو کیا جائے گا۔ اس ادارے میں بھرتیوں کا عمل 10 جولائی تک مکمل کرنے کی ہدایت بھی دی گئی۔
اجلاس میں ڈائیسپورا ڈاکٹر لوکم پروگرام، یعنی DDLP، کی بھی منظوری دی گئی۔ اس پروگرام کے تحت بیرون ملک مقیم پاکستانی اور غیر ملکی ماہر ڈاکٹرز کو مختصر مدت کے لیے پنجاب کے سرکاری ہسپتالوں میں خدمات انجام دینے کا موقع دیا جائے گا۔
حکام کے مطابق DDLP کے ذریعے تجربہ کار سپیشلسٹ ڈاکٹرز کو پنجاب لا کر صحت کی سہولیات کو بہتر بنایا جائے گا۔ وزیراعلیٰ نے اس پروگرام کے تحت آنے والے ڈاکٹرز کو بہتر معاوضہ دینے کا فیصلہ بھی کیا۔
بریفنگ میں بتایا گیا کہ DDLP کے تحت بیرون ملک سے آنے والے سپیشلسٹ ڈاکٹرز کو آٹھ اقسام کی جدید سرجریوں کی اجازت ہوگی۔ اس پروگرام کے لیے پنجاب کے 12 ہسپتال منتخب کیے گئے ہیں۔
پروگرام میں شمولیت کے لیے ڈاکٹر کا پوسٹ گریجویٹ ہونا ضروری ہوگا۔ اس کے علاوہ کم از کم تین سال کا بیرون ملک فیلوشپ تجربہ اور فٹنس سرٹیفکیٹ بھی لازمی قرار دیا گیا ہے۔ DDLP کے تحت آنے والے ڈاکٹرز کے لیے پنجاب میں کم از کم 15 دن خدمات انجام دینا ضروری ہوگا۔
اجلاس میں DDLP ڈیش بورڈ بھی پیش کیا گیا۔ وزیراعلیٰ نے اسے جلد لائیو کرنے کی ہدایت کی۔ اس پروگرام کے لیے ایک آن لائن ویب پورٹل بھی بنایا جائے گا، جہاں رجسٹریشن، تصدیق، ادائیگی، رپورٹنگ اور تعیناتی سے متعلق تمام معلومات دستیاب ہوں گی۔
بریفنگ میں بتایا گیا کہ بیرون ملک سے آنے والے ڈاکٹرز پنجاب کے مقامی طبی عملے کو تربیت بھی دیں گے۔ وزیراعلیٰ مریم نواز شریف نے نرسنگ سیکٹر کے لیے بھی DDLP طرز کا پروگرام شروع کرنے کی ہدایت کی۔
مریم نواز شریف نے کہا کہ ہسپتالوں کے ڈائریکٹرز مؤثر اور باصلاحیت ہونے چاہئیں۔ انہوں نے کہا کہ نرسنگ کیئر صحت کے نظام میں بہت اہم کردار ادا کرتی ہے، اس لیے پنجاب میں بہترین ڈاکٹرز، نرسز اور انسانی وسائل لانا حکومت کا مشن ہے۔
