بنوں: خیبرپختونخوا کے ضلع بنوں میں نامعلوم افراد نے گھر میں گھس کر فائرنگ کر دی، جس کے نتیجے میں ماں اور دو بچوں سمیت 5 افراد جاں بحق ہو گئے۔
پولیس کے مطابق یہ واقعہ تھانہ ککی کی حدود شابری بھرت میں پیش آیا۔ نامعلوم ملزمان نے گھر میں داخل ہو کر اندھا دھند فائرنگ کی، جس سے گھر میں موجود افراد نشانہ بن گئے۔
فائرنگ کے نتیجے میں ماں، ان کے دو بچوں سمیت پانچ افراد موقع پر جاں بحق ہو گئے۔ واقعے میں ایک بچی سمیت دو افراد زخمی بھی ہوئے ہیں۔
اطلاع ملنے پر پولیس فوری طور پر جائے وقوعہ پر پہنچی اور علاقے کو گھیرے میں لے لیا۔ جاں بحق افراد اور زخمیوں کو ڈسٹرکٹ ہیڈ کوارٹر اسپتال منتقل کر دیا گیا۔
پولیس کے مطابق نامعلوم ملزمان کے خلاف سرکاری مدعیت میں مقدمہ درج کر لیا گیا ہے۔ ملزمان کی گرفتاری کے لیے علاقے میں سرچ آپریشن شروع کر دیا گیا ہے۔
-پولیس کا کہنا ہے کہ واقعے کی مختلف پہلوؤں سے تحقیقات جاری ہیں۔ ملزمان کو جلد گرفتار کرنے کی کوشش کی جا رہی ہے
