گلیات اور اس کے گردونواح میں موسم نے اچانک کروٹ بدل لی ، مختلف علاقوں میں تیز بارش اور چھانگلہ گلی میں شدید برفباری کا سلسلہ شروع ہو گیا ہے، برفباری اور بارش کے باعث ہزاری ڈویژن کے مختلف علاقوں میں سردی کی شدت میں اچانک اضافہ ہو گیا ۔
ہری پور( مہر سیماب) گلیات اور گردونواح میں وقفے وقفے سے جاری تیز بارش کے ساتھ ساتھ چھانگلہ گلی اور دیگر بالائی علاقوں میں برفباری کا سلسلہ تیز ہو گیا ہے، برفباری کے باعث پہاڑوں نے سفید چادر اوڑھ لی ۔
ہزارہ ڈویژں کے مختلف علاقوں میں سردی کی شدید لہر دوڑ گئی ہے، جبکہ ہری پور اور اس کے ملحقہ علاقوں میں بھی مسلسل بارش سے موسم انتہائی سرد اور خوشگوار ہو گیا ہے جبکہ درجہ حرارت بھی منفی ہو گیا ہے ۔
دوسری جانب برفباری کے آغاز کے ساتھ ہی ڈی پی او ایبٹ آباد ہارون رشید خان کی خصوصی ہدایات پر ایبٹ آباد پولیس کو مکمل الرٹ کر دیا گیا، پولیس کے اہلکار اہم شاہراہوں اور سیاحتی مقامات پر سیاحوں کی حفاظت اور رہنمائی کے لیے ہمہ وقت متحرک اور تعینات ہیں ۔
ڈی پی او ایبٹ آباد نے سیاحوں اور مقامی لوگوں کے لیے اہم ہدایات جاری کرتے ہوئے کہا ہے کہ برفباری کے دوران غیر ضروری سفر سے مکمل گریز کیا جائے ۔
پولیس ترجمان کا کہنا ہے کہ گلیات کی سڑکوں پر پھسلن بڑھنے کے باعث محتاط ڈرائیونگ کی جائے، اور سیاح گاڑیوں کے ٹائروں، بریکس اور دیگر ضروری آلات کی جانچ پڑتال یقینی بنائیں ۔
ترجمان پولیس کے مطابق ایبٹ آباد پولیس تمام سیاحتی مقامات پر زائرین و سیاحوں کی مدد کے لیے تیار ہے، لہٰذا تمام مسافر موسم کی تازہ ترین صورتحال سے باخبر رہیں اور انتظامیہ کی ہدایات پر عمل کریں ۔
