کراکس: وینزویلا میں شدید زلزلوں نے بڑے پیمانے پر تباہی مچا دی۔ دارالحکومت کراکس سمیت کئی علاقوں میں عمارتیں گر گئیں، جبکہ امدادی ٹیمیں ملبے تلے دبے افراد کو نکالنے کے لیے کام کر رہی ہیں۔
امریکی جیولوجیکل سروے کے مطابق وینزویلا میں دو طاقتور زلزلے چند لمحوں کے وقفے سے آئے۔ پہلے زلزلے کی شدت 7.2 ریکارڈ کی گئی، جبکہ اس کے فوراً بعد 7.5 شدت کا دوسرا زلزلہ آیا۔ زلزلے کا مرکز کراکس سے تقریباً 160 کلومیٹر مغرب میں بتایا گیا ہے۔
رپورٹس کے مطابق زلزلوں کے بعد کراکس اور قریبی علاقوں میں کئی عمارتیں منہدم ہو گئیں۔ کئی مقامات پر لوگ خوف کے باعث گھروں اور دفاتر سے باہر نکل آئے۔ حکام نے شہریوں کو آفٹر شاکس کے خطرے کے پیش نظر احتیاط کی ہدایت کی ہے۔
وینزویلا کی قائم مقام صدر ڈیلسی روڈریگز نے ملک میں ہنگامی حالت نافذ کر دی ہے۔ ان کے مطابق ابتدائی طور پر 32 افراد کی ہلاکت اور 700 سے زائد افراد کے زخمی ہونے کی تصدیق ہوئی ہے۔ متاثرہ علاقوں میں امدادی کارروائیاں جاری ہیں۔
روڈریگز نے بتایا کہ لا گویرا سمیت کئی علاقوں میں صورتحال انتہائی سنگین ہے۔ کراکس کے مرکزی مائی کیٹیا ایئرپورٹ کو بھی نقصان پہنچا، جس کے بعد فضائی آپریشن متاثر ہوا۔
امریکی جیولوجیکل سروے کے ماڈل کے مطابق زلزلے سے بڑے پیمانے پر جانی نقصان کا اندیشہ ہے۔ ماہرین نے خدشہ ظاہر کیا ہے کہ اموات کی تعداد ہزاروں تک پہنچ سکتی ہے، جبکہ 10 ہزار سے زائد اموات کا امکان بھی ظاہر کیا گیا ہے۔ تاہم یہ تعداد ابھی حتمی نہیں ہے۔
امریکی صدر ڈونلڈ ٹرمپ نے وینزویلا میں زلزلے سے ہونے والی تباہی پر افسوس کا اظہار کیا ہے۔ رپورٹس کے مطابق انہوں نے امریکی اداروں کو امدادی کارروائیوں میں مدد کی ہدایت کی ہے۔
دوسری جانب امریکا کی ریاست کیلیفورنیا کے شمالی علاقے میں بھی 5.6 شدت کا زلزلہ ریکارڈ کیا گیا۔ ایسوسی ایٹڈ پریس کے مطابق یہ زلزلہ مینڈوسینو کاؤنٹی کے قریب آیا، جس سے کچھ افراد کے زخمی ہونے اور بجلی کی بندش کی اطلاعات سامنے آئیں۔
حکام کے مطابق وینزویلا میں امدادی کام تیز کر دیے گئے ہیں۔ اسپتالوں میں ایمرجنسی نافذ ہے، جبکہ متاثرہ علاقوں میں شہریوں کو محفوظ مقامات پر منتقل کیا جا رہا ہے۔
