وزیرِ اعظم شہباز شریف کی ہدایت پر امیر طبقے کی لگژری گاڑیوں میں استعمال ہونے والے ہائی آکٹین فیول پر موجودہ لیوی 100 روپے فی لیٹر سے بڑھا کر 300 روپے فی لیٹر کر دی گئی ہے ۔
اسلام آباد: وزیر اعظم کی زیر صدارت وڈیو لنک کے ذریعے اہم اجلاس ہوا جس میں وزیراعظم نے ہدایت دیتے ہوئے کہا کہ مہنگی گاڑیوں میں استعمال ہونے والے ہائی آکٹین فیول پر لیوی بڑھائی جائے تاکہ معیشت پر بوجھ کم ہو اور امیر طبقہ زیادہ حصہ ڈالے جس سے حکومت کو ماہانہ اربوں روپے کی بچت ہوگی اور اس ریلیف کو عوام تک منتقل کیا جائے گا ۔
اجلاس میں وفاقی وزیر قانون و انصاف اعظم نذیر تارڑ، وزیر خزانہ محمد اورنگزیب، وزیر اطلاعات عطاء اللہ تارڑ، وزیر پیٹرولیم علی پرویز ملک اور دیگر اعلیٰ حکام نے شرکت کی ۔
وزیراعظم نے کہا کہ اس بچت کو عوامی ریلیف کے لیے استعمال کیا جائے گا، جبکہ اس اقدام کا مقصد یہ بھی ہے کہ ملک کے وسائل کا بوجھ زیادہ تر صاحبِ حیثیت طبقہ اٹھائے، اجلاس میں فیصلہ کیا گیا اس فیصلے کے بعد حکومت کو تقریباً 9 ارب روپے ماہانہ بچت متوقع ہے ۔
اجلاس میں واضح کیا گیا کہ عام گاڑیوں میں استعمال ہونے والے ایندھن کی قیمتوں میں کوئی اضافہ نہیں کیا گیا، اور نہ ہی اس فیصلے سے پبلک ٹرانسپورٹ یا ہوائی جہازوں کے کرایوں پر کوئی اثر پڑے گا ۔
واضح رہے کہ وزیرِ اعظم نے اس سے قبل ہائی آکٹین فیول کے معاملے کا نوٹس لیتے ہوئے متعلقہ وزارت کو لائحہ عمل تیار کرنے کی ہدایت کی تھی ۔
