بٹگرام میں شدید بارش، آندھی اور ژالہ باری سے سردی میں اضافہ ہوگیا، کافی عرصہ بعد بارش کے بعد شہریوں کے چہرے کھل اٹھے اور شہریوں نے گرم ملبوسات کا استعمال دوبارہ شروع کردیا ۔
بٹگرام: ضلع بٹگرام اور گردونواح میں تیز بارشوں کا نیا سلسلہ شروع ہوگیا ہے جس کے ساتھ کالی آندھی اور ژالہ باری بھی ریکارڈ کی گئی ۔
اچانک بدلتے موسم کے باعث علاقے میں سردی کی شدت میں نمایاں اضافہ ہوگیا ہے، جس کے بعد شہریوں نے ایک بار پھر گرم ملبوسات کا استعمال شروع کردیا ہے ۔
مسلسل بارش اور خراب موسمی حالات کے باعث روزمرہ زندگی بھی متاثر ہورہی ہے، مقامی افراد کے مطابق اشیائے خوردونوش کی فراہمی میں مشکلات پیش آرہی ہیں جبکہ بازاروں میں سرگرمیاں بھی معمول سے کم نظر آرہی ہیں ۔
خاص طور پر ریڑھی بان اور چھوٹے کاروبار سے وابستہ افراد شدید پریشانی کا شکار ہیں، بارش اور آندھی کے باعث سڑکوں اور بازاروں میں گاہکوں کی آمد کم ہوگئی ہے جس سے ان کی روزی روٹی متاثر ہورہی ہے ۔
مقامی شہریوں کا کہنا ہے کہ خراب موسم کے دوران انتظامیہ کو چاہیے کہ وہ ضروری اشیائے خوردونوش کی دستیابی کو یقینی بنائے اور چھوٹے کاروباری افراد کی مشکلات پر بھی توجہ دے ۔
موسمی ماہرین کے مطابق آئندہ چند دنوں تک وقفے وقفے سے بارش کا سلسلہ جاری رہنے کا امکان ہے جس کے باعث سردی کی شدت برقرار رہ سکتی ہے ۔
