گلگت: این ایل سی کی جانب سے گلگت بلتستان کے ضلع غذر میں پھنڈر سرمائی کھیلوں کا انعقاد کیا گیا، این ایل سی نے پھندر ونٹر سپورٹس کلب اور غذر سپورٹس نیٹ ورک کے اشتراک سے ان کھیلوں کا انعقاد کیا ۔
این ایل سی کے زیر اہتمام پھنڈرسرمائی کھیلوں کے مقابلے میں خواتین کی ٹیم پھنڈر ٹراوٹس نے یاسین جانباز کو شکست دے کر آئس ہاکی چمپئن شپ جیت لی ،مردوں کے آئس ہاکی مقابلے میں پھنڈر ٹراؤٹس نے جی بی سکاؤٹس کو زیر کرتے ہوئے فتح حاصل کی ۔
ان مقابلوں کا مقصد خطے میں روایتی کھیلوں اور سیاحت کو فروغ دینا ہے، گلگت بلتستان کے علاوہ اس مقابلے میں ملک بھر کے دیگر حصوں سے بڑی تعداد میں شائقین نے شرکت کی ۔
کھیلوں کے اس میلے نے مقامی لوگوں کو تفریح فراہم کرنے کے ساتھ سماجی اور اقتصادی سرگرمیاں بھی پیدا کیں، میلے میں موسم سرما کے روایتی کھیلوں کے علاو ہ خواتین اور مردوں کی ٹیموں کے آئس ہاکی کے مقابلے بھی شامل تھے ۔
ان مقابلوں کی خصوصیت خواتین کا مختلف کھیلوں میں حصہ لینا تھا جنہوں نے دلچسپ مقابلوں میں اپنی صلاحیتیوں کا لوہا منوایا ۔
