سابق آرمی چیف جنرل قمر جاوید باجوہ کا کہنا ہے کہ دوست ملک کے حوالے سے بشریٰ بی بی کا بیان 100 فیصد جھوٹا ہے، میں خانہ کعبہ جا کر یہ بات کرنے کو تیار ہوں کہ جو بشریٰ بی بی کی جانب سے بات کی گئی وہ بالکل جھوٹ ہے، دورے کے بعد ان کے پاس کوئی کالز نہیں آئیں،میڈیا رپورٹس کے مطابق سابق آرمی چیف نے بانی پی ٹی آئی عمران خان کی اہلیہ بشریٰ بی بی کے بیان کی تردید کر دی ۔
انہوں نے کہا کہ جو ننگے پاوں مدینہ جانے والی بات کی گئی اس کے بعد ان کو تحائف ملے۔ ہار اور گھڑیاں ملیں۔ بلکہ بشریٰ بی بی کی بیٹی کی شادی بھی مدینہ میں ہوئی تھی۔
بشریٰ بی بی کے دورے پر ان کیلئے خانہ کعبہ اور روضہ رسول کا دروازہ کھولا گیا ۔انہوں نے کہا کہ مجھے فکر اور تشویش ہے۔ ریٹائرڈ فوجی کے پاس اپنا کوئی دفاع نہیں ہوتا۔ سویلین تو کسی بھی حوالے سے بات کر لیتے ہیں، لگتا ہے بشریٰ بی بی نے لوگوں کو اکٹھا کرنے کیلئے شریعت کی باتیں شروع کردی ہیں۔جنرل (ر) قمر جاوید باجوہ کامزید کہنا تھا کہ سعودی عرب سے ان کے تعلقات کبھی بھی خراب نہیں ہوئے۔
بشریٰ بی بی نے اپنے ویڈیو بیان میں کہا تھاکہ جنرل باجوہ کو کہا گیا کہ یہ آپ کس شخص کو لے کر آئے ہیں ہمیں ایسے لوگ نہیں چاہئیں۔ باجوہ کو کہا گیاتھا ہم تو ملک میں شریعت ختم کرنے لگے ہیں اور آپ ایسے شخص کو لے کر آئے۔اپنے ویڈیو پیغام میں بشریٰ بی بی نے کہا کہ تب سے ہمارے خلاف گند ڈالنا شروع کر دیا گیاتھا۔
