ٹیکسلا میں ویساک ڈے 2026 کی مرکزی تقریب کا انعقاد کیا گیا، جس میں وزیراعلیٰ پنجاب مریم نواز شریف کی ہدایت پر صوبائی وزیر رمیش سنگھ اروڑا نے خصوصی شرکت کی. وفاقی وزیر قومی ورثہ و ثقافت اورنگزیب کھچی مہمانِ خصوصی تھے۔
تقریب میں سیکرٹری ٹورازم اور ڈی جی آرکیالوجی بھی موجود تھے۔ دھرمراجیکا اسٹوپا پر مذہبی رسومات ادا کی گئیں اور عالمی بھکشوؤں نے خصوصی دعاؤں کی قیادت کی۔ٹیکسلا میوزیم میں منعقدہ تقریب میں مختلف ممالک کے سفارتکاروں اور معزز مہمانوں نے شرکت کی۔
اس موقع پر امن کی گھنٹی بجائی گئی اور سفید کبوتروں کو فضا میں چھوڑ کر عالمی امن کا پیغام دیا گیا، جبکہ بدھ مت ورثے کے فروغ کے لیے خصوصی سیشنز بھی منعقد ہوئے۔ سری لنکا، تھائی لینڈ، نیپال، میانمار اور ویتنام کے مندوبین نے بھی شرکت کی۔
رمیش سنگھ اروڑا نے کہا کہ ویساک ڈے بدھ مت کے پیروکاروں کے لیے انتہائی مقدس دن ہے اور ٹیکسلا و دھرمراجیکا سٹوپا بدھ مت کے عظیم تاریخی ورثے کی روشن مثالیں ہیں، جو پاکستان کی پہچان ہیں۔
انہوں نے کہا کہ وزیراعلیٰ پنجاب مذہبی ہم آہنگی کے فروغ اور بدھ مت کے تاریخی مقامات کے تحفظ کے لیے عملی اقدامات کر رہی ہیں۔
ان کا کہنا تھا کہ پاکستان بدھ مت کے عالمی ورثے کا امین ہے اور ویساک ڈے دنیا کو امن، رواداری اور بھائی چارے کا پیغام دیتا ہے۔ انہوں نے مزید کہا کہ ٹیکسلا کی تاریخی سرزمین پر عالمی سفارتی شخصیات کی شرکت بین المذاہب ہم آہنگی کے فروغ کا مظہر ہے۔
