اسلام آباد: محکمہ موسمیات نے گلگت بلتستان اور خیبر پختونخوا میں گلیشیئر پھٹنے، شدید بارشوں اور سیلاب کے خطرے کے پیش نظر اہم الرٹ جاری کر دیا ہے۔
محکمہ موسمیات کے مطابق 3 مئی 2026 سے ایک معتدل مغربی لہر پاکستان کے بالائی علاقوں میں داخل ہونے کی توقع ہے، جس کے باعث موسم کی صورتحال میں نمایاں تبدیلی آئے گی۔
اس دوران گلگت بلتستان اور خیبر پختونخوا کے مختلف علاقوں میں بارش، آندھی، گرج چمک اور بعض مقامات پر موسلادھار بارش کا امکان ہے، جو سیلابی صورتحال کو جنم دے سکتی ہے۔
ماہرین کے مطابق درجہ حرارت میں اچانک اضافے کے بعد اس قسم کی بارشیں معمول کا حصہ ہوتی ہیں، تاہم یہ صورتحال گلیشیل لیک آؤٹ برسٹ فلڈ (GLOF)، لینڈ سلائیڈنگ اور ملبے کے بہاؤ کے خطرات کو بڑھا دیتی ہے۔
خاص طور پر ہوپر، غلکین، ششپر، یاسین، پھنڈر، بڈسوات، لوئر ہنزہ، نگر، گھانچے، دیر اور دیر بالا جیسے علاقے زیادہ خطرے کی زد میں ہیں۔
حکام نے برفانی وادیوں میں رہنے والے افراد کو ہدایت کی ہے کہ بارش کے دوران ندی نالوں اور دریاؤں کے قریب جانے سے گریز کریں۔
مزید کہا گیا ہے کہ اگر پانی کے رنگ میں اچانک تبدیلی یا غیر معمولی آوازیں جیسے پتھروں کے ٹکرانے کی آواز سنائی دے تو فوری طور پر محفوظ مقام کی طرف منتقل ہو جائیں۔
شہریوں کو ہدایت دی گئی ہے کہ مویشیوں اور ضروری اشیا کو بلند اور محفوظ مقامات پر منتقل کریں اور مقامی ڈیزاسٹر مینجمنٹ کمیٹیوں کے ساتھ رابطے میں رہیں۔
محکمہ موسمیات کے مطابق ڈیزاسٹر مینجمنٹ ادارے 24 گھنٹے الرٹ ہیں اور دور دراز علاقوں میں بھی صورتحال پر مسلسل نظر رکھی جا رہی ہے۔
عوام سے اپیل کی گئی ہے کہ وہ تازہ ترین صورتحال سے باخبر رہیں، احتیاطی تدابیر اختیار کریں اور کسی بھی ممکنہ خطرے سے بچنے کے لیے پیشگی اقدامات کریں تاکہ جانی و مالی نقصان سے محفوظ رہا جا سکے۔
