اپر چترال میں افغان مہاجرین کے انخلاء کے سلسلے میں افغان انخلاء کمیٹی کا اہم اور آخری اجلاس ایڈیشنل ڈپٹی کمشنر محمد انور کی زیر صدارت منعقد ہوا۔ اجلاس میں افغان باشندوں کی واپسی سے متعلق اب تک ہونے والی پیش رفت کا تفصیلی جائزہ لیا گیا۔
اجلاس کے دوران کمیٹی کی جانب سے بتایا گیا کہ فائنل مرحلے کے لیے افغان مہاجرین کا تازہ ترین ڈیٹا مکمل طور پر تیار کر لیا گیا ہے، تاہم پولیس کی جانب سے مطلوبہ تعاون اور نفری کی عدم دستیابی کے باعث انخلاء کے عمل میں مشکلات پیش آ رہی ہیں۔
اس موقع پر ایڈیشنل ڈپٹی کمشنر محمد انور نے کمیٹی کے تمام اراکین اور پولیس حکام کو سخت ہدایات جاری کرتے ہوئے کہا کہ افغان مہاجرین کی واپسی سے متعلق تمام انتظامات ہر صورت 6 فروری سے قبل مکمل کیے جائیں۔ انہوں نے واضح کیا کہ مقررہ تاریخ کے بعد کسی قسم کا عذر یا کوتاہی قابل قبول نہیں ہوگی۔
ایڈیشنل ڈپٹی کمشنر نے خبردار کیا کہ اگر انخلاء کے عمل میں غفلت یا تاخیر پائی گئی تو ذمہ دار سرکاری اہلکاروں اور پولیس افسران کے خلاف سخت قانونی کارروائی عمل میں لائی جائے گی۔ انہوں نے کہا کہ حکومت کے احکامات پر مکمل عملدرآمد یقینی بنایا جائے تاکہ انخلاء کا عمل پرامن اور منظم انداز میں مکمل کیا جا سکے۔
