اسلام آباد: وفاقی وزیر داخلہ محسن نقوی نے تربت میں بزدلانہ حملے میں شہید ہونے والی لیڈی کانسٹیبل شکیلہ کو شاندار الفاظ میں خراجِ عقیدت پیش کیا ہے۔
اپنے بیان میں محسن نقوی نے کہا کہ بلوچستان کی بہادر بیٹی نے فرض کی ادائیگی کے دوران وطنِ عزیز پر اپنی جان قربان کر کے عظیم مثال قائم کی۔
انہوں نے کہا کہ لیڈی کانسٹیبل شکیلہ نے شہادت کا بلند رتبہ حاصل کیا اور اپنی جان کا نذرانہ پیش کرنے والی اس بہادر بیٹی کو پوری قوم سلام پیش کرتی ہے۔
وفاقی وزیر داخلہ کا کہنا تھا کہ شہید لیڈی کانسٹیبل شکیلہ کی عظیم قربانی کو ہمیشہ یاد رکھا جائے گا۔
شکیلہ جیسی بہادر بیٹیاں قوم کا فخر ہیں۔
محسن نقوی نے حملے میں زخمی ہونے والے شہید خاتون کے شوہر اور بیٹے کی جلد صحتیابی کے لیے دعا بھی کی۔
