جنوبی وزیرستان کے علاقے وانا بازار میں آج صبح ہونے والے بم دھماکے میں چیف آف احمدزئی وزیر ملک طارق وزیر شہید ہو گئے، جبکہ متعدد افراد زخمی ہو گئے۔
ذرائع کے مطابق دھماکا اس وقت ہوا جب ملک طارق وزیر بازار میں موجود تھے۔ دھماکے کے نتیجے میں ملک طارق وزیر سمیت اب تک تین افراد جاں بحق ہونے کی تصدیق ہوئی ہے، جبکہ متعدد افراد زخمی بتائے جا رہے ہیں۔
ریسکیو ذرائع کا کہنا ہے کہ زخمیوں کو فوری طور پر ہیڈکوارٹر اسپتال وانا منتقل کر دیا گیا، جہاں ایمرجنسی نافذ کر دی گئی ہے۔ اسپتال انتظامیہ کے مطابق کئی زخمیوں کی حالت تشویشناک ہے۔
واقعے کے بعد پولیس اور دیگر سیکیورٹی اداروں کی بھاری نفری جائے وقوعہ پر پہنچ گئی اور علاقے کو گھیرے میں لے کر تحقیقات شروع کر دی گئی ہیں۔ دھماکے کی نوعیت اور ذمہ داروں کے حوالے سے مزید تفتیش جاری ہے۔
