ضلعی انتظامیہ کی ہدایات کی روشنی میں محکمہ ہائی وے کی جانب سے ضلع بھر میں سڑکوں اور حفاظتی دیواروں کی بہتری کے لیے خصوصی اقدامات کیے جا رہے ہیں، اس سلسلے میں اہم شاہراہوں، موڑوں، خطرناک مقامات اور حفاظتی دیواروں پر نمایاں رنگ و روغن کیا جا رہا ہے تاکہ حادثات کے امکانات کو کم سے کم کیا جا سکے ۔
مری: یہ اقدام خاص طور پر مری جیسے پہاڑی علاقے میں نہایت اہمیت کا حامل ہے جہاں تیز موڑ، دھند اور پھسلن کے باعث حادثات کا خدشہ بڑھ جاتا ہے ۔
سڑکوں کے کناروں اور دیواروں پر چمکدار اور واضح رنگ کرنے سے رات کے وقت اور خراب موسم میں بھی ڈرائیورز کو راستے کی نشاندہی بہتر انداز میں ہو سکے گی ۔
مزید برآں، اس مہم کا ایک اہم مقصد شہری خوبصورتی کو فروغ دینا بھی ہے۔ رنگ و روغن کے اس عمل سے نہ صرف سڑکیں محفوظ ہوں گی بلکہ سیاحوں اور مقامی افراد کے لیے ایک خوشگوار اور دلکش ماحول بھی فراہم ہوگا ۔
ضلعی انتظامیہ کی جانب سے عوام سے اپیل کی گئی ہے کہ وہ اس عمل میں تعاون کریں اور ٹریفک قوانین کی پابندی کو یقینی بنائیں تاکہ انسانی جانوں کا تحفظ ممکن بنایا جا سکے ۔
