راولپنڈی کی انسداد دہشتگردی کی عدالت نے اڈیالہ جیل میں بانی پی ٹی آئی سے ملاقات سے متعلق وکیل فیصل ملک کی درخواست خارج کرتے ہوئے اسے غیر ضروری اور فضول قرار دیدیا، عدالت نے اپنے فیصلے میں درخواست گزار پر جرمانہ بھی عائد کردیا ۔
راولپنڈی: انسدا دہشت گردی کی عدالت نے بانی پی ٹی آئی سے ملاقات کی درخواست پر فیصلہ سناتے ہوئے درخواست گزار پر 10 ہزار روپے جرمانہ عائد کر دیا ۔
عدالت نے اپنے فیصلے میں حکم دیا کہ جرمانہ ڈسٹرکٹ بار راولپنڈی کی ڈسپینسری میں جمع کروایا جائے، عدالت کا اپنے فیصلے میں مزید کہنا تھا کہ یہ جرمانہ غریب مریضوں کے علاج پر خرچ کیا جائے گا ۔
عدالتی فیصلے کے مطابق اڈیالہ جیل میں ملاقاتوں کا طریقہ کار اسلام آباد ہائیکورٹ پہلے ہی طے کرچکی ہے، ٹرائل کورٹ ملاقاتوں پر کوئی متضاد حکم جاری نہیں کرسکتے ۔
دوران سماعت عدالت نے ریمارکس دیئے کہ عمران خان جی ایچ کیو حملہ کیس میں ضمانت پر ہیں جوڈیشل تحویل میں نہیں، بانی پی ٹی آئی سے ملاقات کیلئے پہلے بھی اسی نوعیت کی 2 درخواستیں دائر کی گئیں، متعلقہ فورم سے رجوع کرنےکے بجائے درخواست گزار عدالت کا وقت ضائع کررہا ہے ۔
