راولپنڈی: تھانہ سٹی پولیس نے اہم کارروائی کرتے ہوئے محکمہ تعلیم کے دفتر سے 9600 سے زائد کتابیں چوری کرنے والے دو افراد کو گرفتار کرلیا ۔
پولیس کے مطابق کارروائی کے دوران گرفتار ملزمان کے قبضے سے لاکھوں روپے مالیتی 9665 کتابیں برآمد کر لی گئیں، برآمد کتابیں حکومت پنجاب کی جانب سے طلبا و طالبات کے لئے پرنٹ کروائی گئیں تھیں ۔
پولیس کا کہنا ہے کہ کتابیں مختلف سکولوں میں پرائمری کے طلبا و طالبات کو مہیا کی جانی تھیں ۔
چوری کی اطلاع پر سی پی او سید خالد ہمدانی نے نوٹس لیتے ہوئے ملوث ملزمان کی گرفتاری اور کتب کی فوری برآمدگی کا حکم دیا تھا ۔
تھانہ سٹی پولیس نے ٹیکنیکل ذرائع اور ہیومن انٹیلی جنس کی مدد سے ملوث افراد کو گرفتار کر کے تمام مسروقہ کتب برآمد کر لیں ۔
پولیس حکام کا کہنا تھا کہ ملزمان کے ساتھیوں و سہولتکاروں کو بھی گرفتار کیا جائے گا، زیر حراست افراد کو ٹھوس شواہد کے ساتھ چالان کر کے قرار واقعی سزا دلوائی جائے گی ۔
