نیشنل ڈیزاسٹر مینجمنٹ اتھارٹی نے حالیہ مون سون بارشوں اور سیلاب سے جانی و مالی نقصانات کی رپورٹ جاری کردی، اس دوران مختلف حادثات کے دوران ملک بھر میں 831 افراد جاں بحق اور 1121 زخمی ہوئے، سب سے زیادہ خیبر پختونخوا میں 480 افراد جاں بحق ہوئے ۔
اسلام آباد: این ڈی ایم اے کے مطابق گزشتہ دو ماہ کے دوران طوفانی بارشوں اورسیلاب کے باعث 831 افراد جاں بحق 1121زخمی ہوئے، بارشوں اور سیلاب کے باعث گلگت بلتستان میں 41 افراد جاں بحق ہوئے، آزاد کشمیر میں 29، اسلام آباد میں 8 افراد سیلابی پانی کی نذر ہوگئے ۔
سیلاب کے دوران مختلکف حادثات میں خیبر پختونخوا میں 480 ،پنجاب میں 191 افراد جاں بحق ہوئے، سندھ میں 58، بلوچستان میں 24 افراد جان سے گئے ۔
این ڈی ایم اے کے مطابق گزشتہ دو روز کے دوران سیلاب کے باعث 16 افراد جاں بحق اور 10 افراد زخمی ہوئے، دو روز کے دوران 13 اموات پنجاب میں رپورٹ ہوئیں جب کہ خیبرپختونخوا، سندھ اور کشمیر میں ایک ایک ہلاکت رپورٹ ہوئی ۔
بارشوں اور سیلاب کے باعث جاں بحق افراد میں 219 بچے، 128 خواتین اور 484 مرد شامل ہیں۔ سیلاب کے باعث 9 ہزار گھروں کو نقصان پہنچا، 6 ہزار سے زائد جانور برساتی پانی کی نذر ہوئے ۔
سیلاب سے 238 پل اور 661 کلومیٹر کی شاہراہیں پانی میں بہہ گئیں، سیلاب کے باعث 35ہزار افراد کیمپوں میں موجود ہیں، خیبر پختونخوا میں 26ہزار، پنجاب میں 6ہزار، گلگت بلتستان میں 3ہزار افراد کیمپوں میں موجود ہیں ۔
امدادی کارروائیوں میں 1880ریسکیو آپریشن کیے گئے، امدادی ٹیموں نے ریسکیو آپریشنز میں 5لاکھ سے زائد افراد کو ریسکیو، کارروائیوں میں پنجاب میں 4لاکھ 85ہزار، خیبر پختونخوا میں 14ہزار افراد کو ریسکیو کیا گیا ۔
