پشاور: نواحی علاقے حسن خیل میں دہشت گردوں نے سپینہ ویلہ پولیس چوکی پر کواڈ کاپٹر (ڈرون) کے ذریعے حملہ کیا.
حملے میں تین پولیس اہلکار زخمی ہو گئے۔
ذرائع کے مطابق حملے میں دہشت گردوں نے جدید طرز کا کواڈ کاپٹر استعمال کیا۔
واقعے کے بعد علاقے میں سیکیورٹی سخت کر دی گئی۔
پولیس اور دیگر قانون نافذ کرنے والے اداروں نے سرچ آپریشن بھی شروع کر دیا۔
مزید بتایا گیا کہ زخمیوں میں کانسٹیبل نیاز امین، کانسٹیبل داؤد اور کانسٹیبل ضیا اللہ شامل ہیں۔
زخمیوں کو فوری طور پر لیڈی ریڈنگ ہسپتال (ایل آر ایچ) منتقل کیا گیا، جہاں انہیں طبی امداد فراہم کی جا رہی ہے۔
کیپٹل سٹی پولیس آفیسر (سی سی پی او) پشاور ڈاکٹر میاں سعید احمد نے لیڈی ریڈنگ اسپتال کا دورہ کیا اور زخمی اہلکاروں کی عیادت کی۔
سی پی او نے زخمیوں کی خیریت دریافت کی، ان کے اہل خانہ سے ملاقات کی اور معالجین کو زخمی اہلکاروں کو بہترین طبی سہولیات فراہم کرنے کی ہدایت کی۔
