پاکستان کی سفارتی کوششیں کامیاب ہوگئیں ، امریکی اور ایران کے درمیان امن معاہدہ طے پاگیا ، معاہدے کو حتمی شکل دینے کا اعلان اتوار کی دوپہر تک متوقع ہے ۔
امریکی اخبار دی واشنگٹن ٹائمز نے ذرائع کا حوالہ دیتے ہوئے کہا ہے کہ ہفتے کی صبح معاہدے کے مسودے پر اتفاق ہو گیا تھا اور اس کا 24 گھنٹوں کے اندر اعلان کیا جا سکتا ہے ۔
اخبار کی رپورٹ کے مطابق مذاکرات کاروں نے اس مسودے کی منظوری دے دی ہے اور امن معاہدے کے مسودے کو حتمی منظوری کے لیے دونوں ممالک کی قیادت کو بھیج دیا گیا ہے ۔
دی واشنگٹن ٹائمز کا کہنا ہے کہ مذاکرات کاروں میں ایرانی پارلیمنٹ کے سپیکر محمد باقر قالیباف، امریکی نائب صدر جے ڈی وینس، خصوصی ایلچی سٹیو وٹکوف اور صدر ٹرمپ کے داماد جیرڈ کشنر شامل ہیں ۔
رپورٹ میں کہا گیا ہے کہ اگر یہ معاہدہ کامیاب ہو جاتا ہے تو یہ گزشتہ 6 ہفتوں سے جاری جنگ بندی کو مستقل امن میں تبدیل کر سکتا ہے اگرچہ صدر ٹرمپ اس بات کا عندیہ دے چکے ہیں کہ نئے حملوں کا امکان بھی موجود رہ سکتا ہے ۔
دی واشنگٹن ٹائمز نے مزید کہا ہے کہ ممکنہ جنگ بندی معاہدے کی تفصیلات تاحال واضح نہیں ہیں۔ یہ بھی غیر واضح ہے کہ اہم اختلافی نکات، بشمول ایران کے جوہری پروگرام کا مستقبل اور پابندیوں میں نرمی کے مطالبات،کس طرح حل کیے جائیں گے ۔
رپورٹ میں مزید کہا گیا ہے کہ دونوں فریقین کو آبنائے ہرمز کو دوبارہ کھولنے کے طریقہ کار پر بھی اتفاق کرنا ہوگا ۔
