واشنگٹن: وفاقی وزیر خزانہ و محصولات سینیٹر محمد اورنگزیب نے آئی ایم ایف کی اعلیٰ قیادت سے اہم ملاقاتیں کیں۔
ملاقاتوں میں پاکستان کی معیشت، جاری اصلاحات اور آئی ایم ایف پروگرام پر پیش رفت کا جائزہ لیا گیا۔
وزیر خزانہ نے آئی ایم ایف کے فرسٹ ڈپٹی منیجنگ ڈائریکٹر ڈین کٹز، ڈپٹی منیجنگ ڈائریکٹر نائجل کلارک، مشرق وسطیٰ و وسطی ایشیا کے ڈائریکٹر جہاد ازور اور پاکستان کے لیے مشن چیف ایوا پیٹرووا سے الگ الگ ملاقاتیں کیں۔
ملاقاتوں میں ایکسٹینڈڈ فنڈ فیسلٹی (EFF)، ریزیلیئنس اینڈ سسٹین ایبلٹی فیسلٹی (RSF) اور فنڈ کے تحت جاری پروگرام پر پیش رفت پر تفصیلی تبادلہ خیال کیا گیا۔
وزیر خزانہ نے بہتر مالیاتی استحکام، محصولات کے اہداف کے حصول، مضبوط زرمبادلہ کے ذخائر، ریکارڈ ترسیلاتِ زر اور کرنٹ اکاؤنٹ کی بہتر صورتحال کو پاکستان کی اہم کامیابیاں قرار دیا۔
اس موقع پر ٹیکس اور توانائی کے شعبوں میں اصلاحات، نجکاری، ٹیرف ریشنلائزیشن، قرضوں کے بہتر انتظام، مالیاتی ذرائع میں تنوع اور عالمی سرمایہ مارکیٹوں میں پاکستان کی واپسی پر بھی گفتگو ہوئی۔
وزیر خزانہ نے حکومت کے مالیاتی نظم و ضبط، ساختی اصلاحات اور پائیدار اقتصادی تبدیلی کے عزم کا اعادہ کرتے ہوئے پاکستان کے اصلاحاتی ایجنڈے پر آئی ایم ایف کے تعاون کو سراہا۔
