اسلام آباد: صدر آصف علی زرداری نے سماجی رابطے کی ویب سائٹ پر اپنے ایک پیغام میں مون سون بارشوں کے پیشِ نظر تمام اداروں کو ہائی الرٹ رہنے کی ہدایت کی ہے۔
اپنے پیغام میں صدر مملکت نے جان و مال کے تحفظ کے لیے ریسکیو اور امدادی اقدامات تیز کرنے کے ساتھ این ڈی ایم اے، پی ڈی ایم ایز اور مقامی اداروں کو مکمل رابطے میں رہنے کی ہدایت کی۔
انہوں نے گلگت بلتستان اور آزاد کشمیر میں بارشوں اور آبی صورتحال کی مسلسل نگرانی کی ہدایت کرتے ہوئے نشیبی علاقوں کو ممکنہ سیلاب کے پیشِ نظر پیشگی تیاریوں کا حکم دیا۔
صدر آصف علی زرداری نے بارشوں سے جاں بحق افراد کے اہلِ خانہ سے اظہارِ تعزیت کیا اور عوام کو انتباہ کیا کہ وہ غیر ضروری سفر سے گریز کریں۔
انہوں نے امدادی سرگرمیوں میں مصروف ریسکیو اور ایمرجنسی اہلکاروں کو خراجِ تحسین پیش کرتے ہوئے حساس علاقوں میں ریسکیو وسائل اور امدادی سامان پیشگی تعینات کرنے کی بھی ہدایت کی۔
