لاہور: نیشنل ہائی ویز اینڈ موٹروے پولیس (این ایچ ایم پی) کے افسران نے بروقت کارروائی کرتے ہوئے سیالکوٹ سے چھینی گئی ایک گاڑی مریدکے کے قریب سے برآمد کرلی، جس پر اعلیٰ حکام نے افسران کو تعریفی اسناد اور نقد انعامات سے نوازا۔
موٹروے پولیس کی جانب سے جاری پریس ریلیز کے مطابق پولیس کو اطلاع ملی تھی کہ سیالکوٹ کے علاقے سے ایک گاڑی چھین لی گئی ہے۔ اطلاع ملتے ہی موٹروے پولیس کی ٹیم نے فوری کارروائی کرتے ہوئے تلاش شروع کی۔
ڈی ایس پی خرم شہزاد کی سربراہی میں انسپکٹر رائے امتیاز اور کانسٹیبل ذیشان پر مشتمل ٹیم نے مؤثر حکمت عملی اپناتے ہوئے مریدکے کے قریب سے گاڑی کو کامیابی کے ساتھ برآمد کرلیا۔
ایڈیشنل آئی جی محمد وصال فخر سلطان نے کامیاب کارروائی پر افسران کی کارکردگی کو سراہتے ہوئے انہیں تعریفی اسناد اور نقد انعامات سے نوازا۔ انہوں نے کہا کہ ایسی کارروائیاں موٹروے پولیس کے افسران کی پیشہ ورانہ صلاحیتوں اور ذمہ داری کے احساس کو ظاہر کرتی ہیں۔
ان کا کہنا تھا کہ انعامات کا مقصد افسران کی حوصلہ افزائی کرنا ہے تاکہ وہ جرائم کی روک تھام اور عوام کے جان و مال کے تحفظ کے لیے مزید مؤثر انداز میں اپنی ذمہ داریاں انجام دیں۔
موٹروے پولیس نارتھ ریجن کے پبلک ریلیشنز آفیسر کے مطابق موٹروے پولیس عوامی تحفظ کو یقینی بنانے کے لیے مسلسل اقدامات کر رہی ہے۔ ان کا کہنا تھا کہ اس طرح کی کارروائیاں نہ صرف جرائم میں کمی کا باعث بنتی ہیں بلکہ عوام کا پولیس پر اعتماد بھی مضبوط کرتی ہیں۔
