ایبٹ آباد: کمشنر ہزارہ فیاض علی شاہ کی زیر صدارت این ٹی ڈی سی 765 کے وی داسو ٹرانسمیشن لائن منصوبے کے حوالے سے ایک اہم اجلاس کمشنر آفس ایبٹ آباد میں منعقد ہوا، جس میں منیجر کنسٹرکشن نے کھمبوں کی تنصیب کے دوران درپیش مختلف مسائل سے متعلق تفصیلی بریفنگ دی ۔
اجلاس میں ڈپٹی کمشنرز ہری پور، مانسہرہ، بٹگرام اور کوہستان کے علاوہ داسو ہائیڈرو پاور پراجیکٹ، دیا میر بھاشا ڈیم پراجیکٹ کے افسران اور این ٹی ڈی سی کے اعلیٰ حکام نے شرکت کی ۔
کمشنر ہزارہ نے تمام ڈپٹی کمشنرز کو ہدایت کی کہ وہ اپنے دفاتر سے ایک فوکل پرسن نامزد کریں تاکہ منصوبے کے دوران پیش آنے والے مسائل کو بروقت حل کیا جا سکے ۔
انہوں نے این ٹی ڈی سی حکام کو بھی ہدایت دی کہ وہ ڈپٹی کمشنرز کے ساتھ مشاورت سے ایک جامع کمیونٹی سپورٹ پروگرام ترتیب دیں، تاکہ مقامی آبادی کو دیرپا فائدہ پہنچے اور منصوبے کے اثرات مثبت طور پر ظاہر ہوں ۔
کمشنر ہزارہ نے اس موقع پر کہا کہ داسو ٹرانسمیشن لائن منصوبہ قومی اہمیت کا حامل ہے، لہٰذا اس کی بروقت تکمیل نہایت ضروری ہے تاکہ پاکستان اور آنے والی نسلیں اس کے ثمرات سے بھرپور استفادہ کر سکیں ۔
