مانسہرہ بفہ میں تین روزہ تبلیغی اجتماع بخیریت اختتام پذیر ہوگیا، اجتماع کے شرکا نے ضلعی انتظامیہ اور پولیس کے مؤثر اقدامات کو خراجِ تحسین پیش کیا ۔
مانسہرہ: بفہ میرا میں منعقد ہونے والا تین روزہ عظیم الشان تبلیغی اجتماع کامیابی اور خیریت کے ساتھ اختتام پذیر ہو گیا۔ اجتماع میں ہزارہ ڈویژن سمیت گلگت بلتستان سے بڑی تعداد میں لوگوں نے شرکت کی ۔
اجتماع کے آخری روز ڈپٹی کمشنر مانسہرہ خالد اقبال اور ڈسٹرکٹ پولیس آفیسر مانسہرہ شفیع اللہ گنڈاپور نے مرکزی پنڈال کا دورہ کیا اور اختتامی دعا میں خصوصی شرکت کی، اس موقع پر ضلعی افسران، علماء کرام، سیاسی و سماجی رہنماؤں، معززینِ علاقہ اور عوام الناس کی بڑی تعداد موجود تھی ۔
اختتامی دعا میں ملک و قوم کی سلامتی، استحکام اور امن و امان کے لیے خصوصی دعائیں کی گئیں، اس کے ساتھ ساتھ مانسہرہ پولیس، ضلعی انتظامیہ اور دیگر تمام قانون نافذ کرنے والے اداروں کی انتھک محنت، پیشہ ورانہ خدمات اور بہترین ڈیوٹی کو بھرپور سراہا گیا اور ان کے لیے بھی خصوصی دعائیں کی گئیں ۔
مانسہرہ پولیس نے اجتماع کے دوران فول پروف سیکیورٹی یقینی بناتے ہوئے داخلی و خارجی راستوں پر چیک پوائنٹس قائم کیے، واک تھرو گیٹس نصب کیے گئے اور اجتماع گاہ کے اطراف پولیس اہلکاروں کی بھاری نفری تعینات کی گئی ۔
ٹریفک کی روانی کو برقرار رکھنے کے لیے ٹریفک پولیس نے مربوط حکمت عملی کے تحت مؤثر اقدامات کیے جن کی بدولت شرکاء کو آمد و رفت میں کسی قسم کی دقت کا سامنا نہیں کرنا پڑا، ان تمام موثر اقدامات پر شرکاء نے مانسہرہ پولیس کا تہہ دل سے شکریہ ادا کیا ۔
ڈی پی او مانسہرہ نے اجتماع کے کامیاب اور پرامن انعقاد کے لیے زبردست ڈیوٹی سر انجام دینے پر تمام افسران و جوانوں کے لیے تعریفی اسناد دینے کا اعلان کیا ۔
