اسلام آباد اور راولپنڈی میں ہونیوالی ہلکی بارش نے سردی کی شدت میں اضافہ کر دیا۔
محکمہ موسمیات کا کہنا ہے کہ آئندہ 24 گھنٹوں کے دوران سندھ کے کچھ اضلاع میں ہلکی بارش کا امکان ہے جس سے وقتی طور پر سردی کی شدت میں اضافہ ہوگا تاہم اس کے بعد موسم بہتر ہو جائے گا۔ پنجاب کے چند میدانی علاقوں میں بھی ہلکی بارش ہوسکتی ہے۔
دوسری جانب ملک کے بالائی علاقوں میں بھی بارش اور برفباری کا سلسلہ جاری ہے۔ وادی سوات کے سیاحتی مقام مالم جبہ اور کالام میں برفباری کا لطف اٹھانے کیلئے سیاح پہنچنا شروع ہوگئے ہیں۔
سوات کے حسین سیاحتی مقام مالم جبہ میں طویل خشک سالی کے بعد برفباری کا آغاز ہوا۔ برفباری سے مالم جبہ کی چوٹی نے سر پر برف کی سفید چادر اڑھ لی۔ مالم جبہ کے علاوہ وادی کالام میں بھی برفباری جاری ہے جس سے وادی کا حسن مزید نکھر گیا۔ ملک بھر سے سیاح پہنچ گئے۔ سیاحوں کا کہنا ہے کہ بڑا سفر کر کے یہاں کے خوبصورت نظارے دیکھنے پہنچیں ہیں۔
خیبر پختون خوا کے پہاڑی علاقوں میں برفباری سے سردی کی شدت میں اضافہ ہوگیا۔ جب کہ پشاور سمیت مختلف شہروں میں بارش بھی ہوئی۔ اس کے علاوہ سکردو میں موسم سرماکی پہلی برف باری ہوئی.
