پشاور (شوبز ڈیسک) خیبر ٹیلی ویژن نیٹ ورک کے قومی چینل کے ٹو نے ایک بار پھر یہ ثابت کر دیا ہے کہ وہ نہ صرف قومی زبان بلکہ پاکستان کی تمام علاقائی زبانوں اور ثقافتوں کی بھرپور ترجمانی کر رہا ہے۔ ہندکو، سرائیکی، پنجابی، پوٹھوہاری، چترالی، کوہستانی اور گلگتی ثقافت کو دنیا بھر میں اجاگر کرنے والا کے ٹو پاکستان کا واحد نجی چینل ہے جسے یہ اعزاز حاصل ہے۔
کے ٹو کا ایک مقبول اور طویل المدت پروگرام ڈھیڈی، جو اپنی مقبولیت کی بدولت نہ صرف ہزارہ بلکہ پاکستان اور بیرونِ ممالک میں بھی شوق سے دیکھا جاتا ہے، معروف میزبان کاشف ملک کی میزبانی میں نشر کیا جا رہا ہے۔ پروگرام کے مرکزی کرداروں میں سواتی ماما اور بھولا شامل ہیں، جنہوں نے اپنی منفرد اداکاری سے ناظرین کے دل جیت رکھے ہیں۔
حال ہی میں اس پروگرام کی ریکارڈنگ کراچی میں کی گئی، جہاں کراچی اور سندھ کے دیگر شہروں میں مقیم ان باصلاحیت افراد کو مدعو کیا گیا جو طویل عرصے سے مختلف شعبہ ہائے زندگی سے وابستہ ہیں۔ ان شوز میں ہزارہ کے قابلِ فخر سپوتوں کو خراجِ تحسین پیش کیا گیا اور ان کی خدمات کو اجاگر کیا گیا، جسے ناظرین کی جانب سے بھرپور پذیرائی حاصل ہو رہی ہے۔
