اسلام آباد: نائب وزیراعظم و وزیر خارجہ سینیٹر محمد اسحاق ڈار سے بنگلہ دیش کے وزیر برائے خواتین، اطفال اور سماجی بہبود ڈاکٹر زاہد حسین نے وزارتِ خارجہ میں ملاقات کی۔
دونوں رہنماؤں نے تجارت، تعلیم، سماجی بہبود اور عوامی روابط سمیت مختلف شعبوں میں دوطرفہ تعاون کے فروغ پر تبادلۂ خیال کیا۔
ترجمان دفتر خارجہ کے مطابق نائب وزیراعظم نے او آئی سی خواتین وزارتی کانفرنس میں بنگلہ دیش کی شرکت کو سراہتے ہوئے او آئی سی کے فریم ورک کے تحت خواتین کو بااختیار بنانے کے لیے تعاون کے فروغ کے حوالے سے پاکستان کے عزم کا اعادہ کیا۔
محمد اسحاق ڈار نے گزشتہ سال اگست میں اپنے ڈھاکہ کے دورے کا ذکر کرتے ہوئے دوطرفہ تعلقات کو مزید مضبوط بنانے کے عزم کا بھی اعادہ کیا۔
حالیہ ملاقات میں باہمی دلچسپی کے مختلف شعبوں میں تعاون بڑھانے پر بھی اتفاق کیا گیا۔
