بھارت میں ظالم باپ نے ایک غیر لڑکے سے دوستی پر اپنی کم عمر بیٹی کا گلا کاٹ کر اس کے ٹکڑے کردیے۔
غیر ملکی خبر رساں ادارے کے مطابق یہ واقعہ بھارت کی ریاست اترپردیش کے گاؤں لکشمن پور ماتھی میں پیش آیا جہاں نعیم خان نے اپنی 17 سالہ بیٹی کو ایک غیر لڑکے سے راہ و رسم بڑھانے پر بڑی بے دردی سے قتل کردیا۔
پولیس نے اس معاملے کی تفتیش کرتے ہوئے بتایا کہ نعیم خان نے تیز دھار آلے سے بیٹی کا گلا کاٹ کر اسے قتل کیا اوراس کے ہاتھ اور ٹانگیں بھی کاٹ ڈالیں اور پھر لاش کے پاس ہی بیٹھ گیا۔پولیس کا کہنا ہے کہ17 سالہ لڑکی اپنے ہی گاؤں کے ایک لڑکےکو پسند کرتی تھی اور دو بار پہلے بھی اس کے ساتھ گھر سے بھاگ چکی تھی ـ پولیس نے بتایا کہ لڑکی کی والدہ نے شوہر کے خلاف بیٹی کو قتل کرنے کی شکایت درج کروائی جس پر پولیس نے کارروائی کی اور ملزم کو گرفتار کرلیا۔
ملزم کا کہنا تھا کہ اس کی بڑی بیٹی کی وجہ سے گاؤں میں خاندان کی بدنامی بھی ہوئی جب کہ لڑکا مختلف کیسز میں جیل کی سزا بھی کاٹ چکا ہےپولیس کے مطابق لڑکی کی لاش کو تحویل میں لے کر پوسٹ مارٹم کیلئے بھیج دیا گیا ہے۔
