اسلام آباد پولیس نے درجنوں موٹر سائیکل چوری کرنے والے ملزم محمد آصف کو گرفتار کر لیا ہے۔
ذرائع کے مطابق تھانہ کوہسار پولیس نے کاروائی کرتے ہوئے ملزم کے قبضے سے ایک ہنڈا 125 سمیت مجموعی طور پر 19 موٹرسائیکلیں برآمد کر لی ہیں۔ اس کے ساتھ ساتھ، 9 موٹرسائیکلوں کی نمبر پلیٹس اور متعدد موٹرسائیکلوں کے سپیئر پارٹس بھی برآمد کئے گئے ہیں۔
گرفتار ملزم کے پاس موٹرسائیکل چوری کرنے کے آلات بھی موجود تھے، جن کی مدد سے تھانہ کوہسار میں درج 9 مقدمات کی تحقیقات کی جا رہی ہیں۔
مزید یہ کہ، ملزم پنجاب میں موٹر سائیکل چوری کے 14 مقدمات میں بھی سابقہ ریکارڈ یافتہ نکلا ہے۔
یہ کارروائی ایس ایچ او کوہسار شفقت فیض کی زیر نگرانی اے ایس آئی محمد اسحاق اور ان کی ٹیم نے سر انجام دی ہے۔
ذرائع کے مطابق ڈی آئی جی اسلام آباد سید علی رضا نے پولیس ٹیم کی کارکردگی کو سراہا ہے۔یاد رہے اسلام آباد پولیس جرائم پیشہ عناصر کے خلاف بھرپور کریک ڈاؤن جاری رکھے ہوئے ہے۔
