اسلام آباد اور راولپنڈی میں شدید دھند کے باعث اسلام آباد انٹرنیشنل ائیرپورٹ کا فلائٹ آپریشن شدید متاثر ہو گیا ہے۔
اطلاعات کے مطابق اسلام آباد پہنچنے والی تین پروازوں کو لاہور اور پشاور اتار لیا گیا جب کہ درجن بھر پروازوں کی آمد اور روانگی متاثر ہوئی ہے۔ ذرائع کے مطابق نجی ائیر لائن کی کراچی سے اسلام آباد کی پرواز کو فضا میں آدھا گھنٹہ انتظار کے بعد لاہور میں لینڈ کرایا گیا جب کہ شارجہ اسلام آباد کی پرواز پی کے 182 کو بھی پشاور میں اتارا گیا، پی آئی اے کی دبئی سے اسلام آباد پہنچنے والی پرواز بھی لاہور منتقل کردی گئی
ایوی ایشن کی اطلاعات کے مطابق اسلام آباد سے برٹش ائیرویز کی پرواز لندن اورامارات کی پرواز مطلع صاف ہونے کے لیے دبئی روانگی کی منتظر رہی۔ اس کے ساتھ ساتھ دھند کے باعث اسلام آباد سے گلگت اور بحرین کی پروازیں بھی وقت پر روانہ نہ ہو سکیں۔
