غذر کے علاقے میں ایک ہی خاندان کے چار افراد دریا کی نذر ہوگئے ، دو خواتین سمیت تین افراد لاپتہ ہوگئے جن کی تلاش کیلئے ریسکیو آپریشن شروع کردیا گیا ہے ۔
گلگت: ترجمان گلگت بلتستان حکومت فیض اللہ فراق کے مطابق ضلع غذر کے گاؤں ہاتون میں ایک افسوسناک واقعہ پیش آیا، جہاں ایک ہی خاندان کے چار افراد دریائے غذر کی خونی موجوں کی نذر ہو گئے ۔
انہوں نے کہا کہ خاندان کے ایک فرد نے دریا میں چھلانگ لگا دی ، اُسے بچانے کے لیے خاندان کے تین افراد یکے بعد دیگرے دریا میں کود گئے ۔
ترجمان کا کہنا ہے کہ ان میں سے ایک شخص کو زندہ بچا لیا گیا، جبکہ ایک مرد اور دو خواتین دریا میں ڈوب کر لاپتہ ہو گئے ہیں، جن کی تلاش جاری ہے ۔
فیض اللہ فراق نے کہا کہ وزیر اعلی گلگت بلتستان حاجی گلبر خان نے اس افسوس ناک واقعے کا نوٹس لیتے ہوئے ڈپٹی کمشنر غذر اور دیگر متعلقہ اداروں کو ہدایت کی ہے کہ وہ لاپتہ افراد کو تلاش اور ریسکیو کیلئے تمام وسائل بروئے کار لائیں اور سرچ آپریشن کو تیز کریں ۔
