نیشنل ڈیزاسٹر منیجمنٹ اتھارٹی نے 24 سے 48 گھنٹوں کے دوران مزید بارشوں اور ممکنہ سیلاب کا الرٹ جاری کردیا، اس دوران شدید بارشوں کے دوران کوہستان، مانسہرہ میں سیلابی صورتحال جبکہ مظفرآباد اور نیلم ویلی میں لینڈ سلائیڈنگ کا خدشہ ظاہر کیا گیا ہے ۔
این ڈی ایم اے کےمطابق 26 تا 28جون کے دوران اسلام آباد، فیصل آباد، سرگودھا اور میانوالی میں تیز ہواؤں کے ساتھ موسلادھار بارش کا امکان ہے ۔
ترجمان این ڈی ایم اے نے اگلے 48 گھنٹوں کے دوران خیبرپختونخوا کے پہاڑی علاقوں لینڈسلائیڈنگ کا امکان ظاہر کیا ہے، سوات، کوہستان، مانسہرہ، ایبٹ آباد میں شدید بارش اور سیلابی صورتحال پیدا ہوسکتی ہے ۔
اسی کے ساتھ ساتھ مظفرآباد، نیلم ویلی، راولا کوٹ، حویلی، ہٹیاں بالا میں بھی طوفانی بارشیں اور لینڈ سلائیڈنگ متوقع ہے ۔
این ڈی ایم اے اور دیگر متعلقہ اداروں نے عوام سے اپیل کی ہے کہ وہ غیر ضروری سفر سے گریز کریں، نشیبی علاقوں میں رہنے والے حفاظتی تدابیر اختیار کریں اور کسی بھی ہنگامی صورتحال میں فوری طور پر مقامی حکام سے رابطہ کریں ۔
